➤ ಪ್ರತಿ ವರ್ಷ ಮೇ 25 ರಂದು ಜಗತ್ತಿನಾದ್ಯಂತ 'ವಿಶ್ವ ಥೈರಾಯ್ಡ್ ದಿನ' (World Thyroid Day) ವನ್ನು ಆಚರಿಸಲಾಗುತ್ತದೆ. ಮಾನವನ ದೇಹದ ಅತ್ಯಂತ ಪ್ರಮುಖ ಗ್ರಂಥಿಗಳಲ್ಲಿ ಒಂದಾದ 'ಥೈರಾಯ್ಡ್' ಕುರಿತು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸುವುದು ಮತ್ತು ಹೆಚ್ಚುತ್ತಿರುವ ಥೈರಾಯ್ಡ್ ಕಾಯಿಲೆಗಳಿಗೆ ಆರಂಭಿಕ ಹಂತದಲ್ಲೇ ಚಿಕಿತ್ಸೆ ಕಂಡುಕೊಳ್ಳುವಂತೆ ಪ್ರೇರೇಪಿಸುವುದು ಈ ದಿನದ ಮುಖ್ಯ ಉದ್ದೇಶವಾಗಿದೆ. 2026 ರ ಈ ವರ್ಷದಲ್ಲಿ, ಜಾಗತಿಕವಾಗಿ ಮತ್ತು ಭಾರತದಲ್ಲಿ ಥೈರಾಯ್ಡ್ ಅಸ್ವಸ್ಥತೆಗಳ ಪ್ರಮಾಣವು ಆತಂಕಕಾರಿಯಾಗಿ ಹೆಚ್ಚುತ್ತಿರುವುದನ್ನು ವರದಿಗಳು ಎತ್ತಿ ತೋರಿಸಿವೆ.
ವಿಶ್ವ ಥೈರಾಯ್ಡ್ ದಿನ 2026 ರ ಧ್ಯೇಯವಾಕ್ಯ (Theme): "ಥೈರಾಯ್ಡ್ ಮತ್ತು ಪೋಷಕಾಂಶ" (Thyroid and Nutrition).
➤ ಥೈರಾಯ್ಡ್ ಫೆಡರೇಶನ್ ಇಂಟರ್ನ್ಯಾಷನಲ್ (TFI) ನಿರ್ಧಾರದಂತೆ 2008 ರಿಂದ ಪ್ರತಿ ವರ್ಷ ಮೇ 25 ರಂದು ಜಾಗತಿಕವಾಗಿ ಈ ದಿನವನ್ನು ಆಚರಿಸಲಾಗುತ್ತಿದ್ದು, ಇದರ ಯಶಸ್ಸಿಗೆ ETA ಮತ್ತು ATA ನಂತಹ ಅಂತರರಾಷ್ಟ್ರೀಯ ಸಂಸ್ಥೆಗಳು ಶ್ರಮಿಸುತ್ತಿವೆ. 
➤ ಥೈರಾಯ್ಡ್ ಗ್ರಂಥಿ: ಥೈರಾಯ್ಡ್ ಮಾನವನ ಕತ್ತಿನ ಮುಂಭಾಗದಲ್ಲಿರುವ, ಸಣ್ಣ ದ್ವಿದಳ ಆಕೃತಿಯ (ಚಿಟ್ಟೆಯ ಆಕಾರದ - Butterfly shaped) ಒಂದು ಅಂತಃಸ್ರಾವಕ ಗ್ರಂಥಿಯಾಗಿದೆ (Endocrine Gland). ಇದು ಕೇವಲ 30 ಗ್ರಾಂಗಿಂತ ಕಡಿಮೆ ತೂಕ ಹೊಂದಿದ್ದರೂ, ದೇಹದ ಪ್ರಮುಖ ಪ್ರಕ್ರಿಯೆಗಳನ್ನು ನಿಯಂತ್ರಿಸುತ್ತದೆ ಚಯಾಪಚಯ ಕ್ರಿಯೆ (Metabolism), ಹೃದಯದ ಕ್ರಿಯೆ, ಭ್ರೂಣದ ಹಂತದಿಂದ ಹಿಡಿದು ಮಗುವಿನ ಮೆದುಳಿನ ಬೆಳವಣಿಗೆಯವರೆಗೆ ಇದು ಅತ್ಯಗತ್ಯ,  ದೇಹದ ತಾಪಮಾನವನ್ನು ನಿಯಂತ್ರಿಸಲು (Thermogenesis) ಸಹಾಯ ಮಾಡುತ್ತದೆ.
➤ ರಾಜೀವ್ ಗಾಂಧಿ ಕ್ಯಾನ್ಸರ್ ಇನ್‌ಸ್ಟಿಟ್ಯೂಟ್ ಮತ್ತು ರಿಸರ್ಚ್ ಸೆಂಟರ್ (RGCIRC) ಹಾಗೂ ಇತ್ತೀಚಿನ ಆರೋಗ್ಯ ವರದಿಗಳ ಪ್ರಕಾರ ಭಾರತದಲ್ಲಿ ಸರಿಸುಮಾರು 42 ಮಿಲಿಯನ್ (4.2 ಕೋಟಿ) ಜನರು ವಿವಿಧ ರೀತಿಯ ಥೈರಾಯ್ಡ್ ಸಮಸ್ಯೆಗಳಿಂದ ಬಳಲುತ್ತಿದ್ದಾರೆ. ಇದು ದೇಶದ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಗೆ ದೊಡ್ಡ ಸವಾಲಾಗಿದೆ. ಪುರುಷರಿಗೆ ಹೋಲಿಸಿದರೆ ಮಹಿಳೆಯರಲ್ಲಿ ಥೈರಾಯ್ಡ್ ಸಮಸ್ಯೆಗಳು ಮತ್ತು ಥೈರಾಯ್ಡ್ ಕ್ಯಾನ್ಸರ್ ಪ್ರಮಾಣ ಗಣನೀಯವಾಗಿ ಹೆಚ್ಚಾಗಿದೆ. ಭಾರತದಲ್ಲಿ ವರದಿಯಾಗುವ ಒಟ್ಟು ಥೈರಾಯ್ಡ್ ಕ್ಯಾನ್ಸರ್ ಪ್ರಕರಣಗಳಲ್ಲಿ ಸುಮಾರು 75% ಮಹಿಳೆಯರಾಗಿದ್ದಾರೆ.
➤ ಪ್ರಮುಖ ಥೈರಾಯ್ಡ್ ಅಸ್ವಸ್ಥತೆಗಳು (Common Thyroid Disorders):
- ಹೈಪೋಥೈರಾಯ್ಡಿಸಮ್ (Hypothyroidism): ಥೈರಾಯ್ಡ್ ಗ್ರಂಥಿಯು ಅಗತ್ಯಕ್ಕಿಂತ ಕಡಿಮೆ ಹಾರ್ಮೋನ್ ಉತ್ಪಾದಿಸಿದಾಗ ಈ ಸ್ಥಿತಿ ಉಂಟಾಗುತ್ತದೆ. (ಲಕ್ಷಣಗಳು: ಅತಿಯಾದ ಆಯಾಸ, ತೂಕ ಹೆಚ್ಚಾಗುವುದು, ಮಲಬದ್ಧತೆ, ಚಳಿ ತಡೆಯಲು ಸಾಧ್ಯವಾಗದಿರುವುದು, ಖಿನ್ನತೆ).
- ಹೈಪರ್‌ಥೈರಾಯ್ಡಿಸಮ್ (Hyperthyroidism): ಥೈರಾಯ್ಡ್ ಗ್ರಂಥಿಯು ಅತಿಯಾಗಿ ಹಾರ್ಮೋನ್ ಉತ್ಪಾದಿಸುವುದರಿಂದ ಇದು ಸಂಭವಿಸುತ್ತದೆ. (ಲಕ್ಷಣಗಳು: ಹಠಾತ್ ತೂಕ ಇಳಿಕೆ, ವೇಗವಾದ ಹೃದಯ ಬಡಿತ, ಆತಂಕ, ಅತಿಯಾದ ಬೆವರುವಿಕೆ).
- ಗಳಗಂಡ ರೋಗ (Goitre): ಆಹಾರದಲ್ಲಿ ಅಯೋಡಿನ್ ಕೊರತೆಯಿಂದಾಗಿ ಕತ್ತಿನ ಭಾಗದಲ್ಲಿರುವ ಥೈರಾಯ್ಡ್ ಗ್ರಂಥಿಯು ಅಸಹಜವಾಗಿ ದೊಡ್ಡದಾಗುವುದು.
- ಥೈರಾಯ್ಡ್ ಕ್ಯಾನ್ಸರ್ (Thyroid Cancer): ಇತ್ತೀಚಿನ ವರ್ಷಗಳಲ್ಲಿ ಇದರಲ್ಲಿ ಪ್ಯಾಪಿಲ್ಲರಿ ಥೈರಾಯ್ಡ್ ಕಾರ್ಸಿನೋಮ (PTC) ಪ್ರಕರಣಗಳು ಭಾರತದಲ್ಲಿ ಹೆಚ್ಚಾಗಿ ಕಂಡುಬರುತ್ತಿವೆ.