➤ ದುಬೈನ ಶಬಾಬ್ ಅಲ್ ಅಹ್ಲಿ ಕ್ಲಬ್‌ನಲ್ಲಿ ನಡೆದ 7ನೇ ರೋಲ್ ಬಾಲ್ ವಿಶ್ವಕಪ್ 2025 ರಲ್ಲಿ ಭಾರತದ ಪುರುಷ ಮತ್ತು ಮಹಿಳಾ ತಂಡಗಳು ವಿಶ್ವ ಚಾಂಪಿಯನ್ ಆಗಿ ಹೊರಹೊಮ್ಮಿವೆ. ಎರಡೂ ವಿಭಾಗಗಳಲ್ಲಿ ಭಾರತವು ಕೀನ್ಯಾವನ್ನು ಸೋಲಿಸಿ ಚಿನ್ನದ ಪದಕ ಗೆದ್ದಿರುವುದು ವಿಶೇಷ. ಈ ಐತಿಹಾಸಿಕ ಗೆಲುವಿನಲ್ಲಿ ಸೂರತ್‌ನ 20 ವರ್ಷದ ಪ್ರತಿಭಾವಂತ ಆಟಗಾರ ಯಶ್ ಅನಿಲ್ ರಶಿಯಾ ಪ್ರಮುಖ ಪಾತ್ರ ವಹಿಸಿದ್ದಾರೆ.
➤ ಪುರುಷರ ವಿಭಾಗ: ಈ ಬಾರಿಯ ರೋಲ್ ಬಾಲ್ ವಿಶ್ವಕಪ್‌ನ ಪುರುಷರ ವಿಭಾಗದಲ್ಲಿ ಭಾರತ ತಂಡವು ಕೀನ್ಯಾ ವಿರುದ್ಧ 11-10 ಅಂತರದ ರೋಚಕ ಜಯ ಸಾಧಿಸಿ, ಐದನೇ ಬಾರಿಗೆ ವಿಶ್ವ ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿದೆ.
➤ ಮಹಿಳೆಯರ ವಿಭಾಗ: ಮಹಿಳೆಯರ ವಿಭಾಗದ ಫೈನಲ್ ಪಂದ್ಯದಲ್ಲಿ ಭಾರತ ತಂಡವು ಕೀನ್ಯಾ ವಿರುದ್ಧ 3-2 ಗೋಲುಗಳ ಅಂತರದಿಂದ ಜಯಗಳಿಸುವ ಮೂಲಕ ತನ್ನ ಮೂರನೇ ವಿಶ್ವಕಪ್ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದೆ.
➤  ಸೂರತ್‌ನ ಕುವರ ಯಶ್ ರಶಿಯಾ ಅವರ ಐತಿಹಾಸಿಕ ಸಾಧನೆ:ಭಾರತದ ಪುರುಷರ ತಂಡದ ಗೆಲುವಿನಲ್ಲಿ ಗುಜರಾತ್‌ನ ಸೂರತ್ ಮೂಲದ 20 ವರ್ಷದ ಯುವ ಆಟಗಾರ ಯಶ್ ಅನಿಲ್ ರಶಿಯಾ ಮಹತ್ವದ ಪಾತ್ರ ವಹಿಸಿದ್ದಾರೆ.
- ನಿರ್ಣಾಯಕ ಪ್ರದರ್ಶನ: ಯಶ್ ಅವರು ಕೀನ್ಯಾ ವಿರುದ್ಧದ ಫೈನಲ್ ಪಂದ್ಯದಲ್ಲಿ ತಂಡಕ್ಕೆ ಜಯ ತಂದುಕೊಟ್ಟ 'ವಿನ್ನಿಂಗ್ ಗೋಲ್' ಬಾರಿಸಿದರು.
- ಟೂರ್ನಿಯ ಹಾದಿ: ಲೀಗ್ ಹಂತದಲ್ಲಿ ಸೌದಿ ಅರೇಬಿಯಾ ಮತ್ತು ಬ್ರೆಜಿಲ್ ವಿರುದ್ಧ ತಲಾ 2 ಗೋಲು, ಕ್ವಾರ್ಟರ್ ಫೈನಲ್‌ನಲ್ಲಿ ಪಾಕಿಸ್ತಾನದ ವಿರುದ್ಧ 2 ಗೋಲು ಮತ್ತು ಸೆಮಿಫೈನಲ್‌ನಲ್ಲಿ ಈಜಿಪ್ಟ್ ವಿರುದ್ಧ 1 ಪ್ರಮುಖ ಗೋಲು ಗಳಿಸಿ ಮಿಂಚಿದರು.
➤ ಯಶ್ ರಶಿಯಾ ಅವರ ಕ್ರೀಡಾ ಹಿನ್ನೆಲೆ:
=> 2009 ರಲ್ಲಿ ಸ್ಕೇಟಿಂಗ್‌ನಿಂದ ಕ್ರೀಡಾ ಬದುಕು ಆರಂಭಿಸಿದ ಇವರು, 2017 ರಲ್ಲಿ ಕೋಚ್ ಜೈಮಿನ್ ಭರತ್ ಪಟೇಲ್ ಮಾರ್ಗದರ್ಶನದಲ್ಲಿ ರೋಲ್ ಬಾಲ್ ಕ್ರೀಡೆಗೆ ಬದಲಾದರು.
=> ಇವರು 18 ರಾಜ್ಯಗಳಲ್ಲಿ ನಡೆದ 17 ರಾಷ್ಟ್ರೀಯ ಮಟ್ಟದ ಪಂದ್ಯಾವಳಿಗಳಲ್ಲಿ ಪಾಲ್ಗೊಂಡಿದ್ದಾರೆ. ಇತ್ತೀಚೆಗೆ ಇಂದೋರ್‌ನಲ್ಲಿ ನಡೆದ 22ನೇ ಸೀನಿಯರ್ ನ್ಯಾಷನಲ್ ಚಾಂಪಿಯನ್‌ಶಿಪ್‌ನಲ್ಲಿ ಬೆಳ್ಳಿ ಪದಕ ಗೆದ್ದಿದ್ದರು.
=> ಇವರ ಯಶಸ್ಸಿನ ಹಿಂದೆ ತಂದೆ ಅನಿಲ್ ವಿಠ್ಠಲ್ ರಶಿಯಾ ಅವರ ಆರ್ಥಿಕ ಬೆಂಬಲ ಮತ್ತು ಸಹೋದರಿ ಮಿತ್ತಲ್ ಅನಿಲ್ ರಶಿಯಾ ಅವರ ಪ್ರೇರಣೆಯಿದೆ.
➤ 'ರೋಲ್ ಬಾಲ್' ಕ್ರೀಡೆ : ರೋಲ್ ಬಾಲ್ ಒಂದು ವಿಶಿಷ್ಟ ಕ್ರೀಡೆಯಾಗಿದ್ದು, ಇದು ರೋಲರ್ ಸ್ಕೇಟಿಂಗ್ (Roller Skating), ಹ್ಯಾಂಡ್‌ಬಾಲ್ (Handball) ಮತ್ತು ಬಾಸ್ಕೆಟ್‌ಬಾಲ್ (Basketball) ಕೌಶಲಗಳ ಸಮ್ಮಿಶ್ರಣವಾಗಿದೆ. ಪ್ರತಿ ತಂಡದಲ್ಲಿ 6 ಆಟಗಾರರು ಇರುತ್ತಾರೆ. ಇದು ಭಾರತದಲ್ಲಿ (ಪುಣೆ) ಉಗಮವಾದ ಕ್ರೀಡೆಯಾಗಿದ್ದು ಇಂದು ಜಾಗತಿಕವಾಗಿ ಬೆಳೆಯುತ್ತಿದೆ. 
➤ ಈ ಯಶಸ್ಸಿನ ನಂತರ ಸೂರತ್‌ನ ಆಟಗಾರರಾದ ಕಾವ್ಯಾ ನಕ್ರಾನಿ, ರಿನಿ ರೂಪಾವತಿಯಾ ಮತ್ತು ಯಶ್ ಚುಡಾಸಮಾ ಅವರಿಗೂ ಅದ್ಧೂರಿ ಸನ್ಮಾನ ಮಾಡಲಾಯಿತು.