ಆರೋಗ್ಯ ಇಲಾಖೆಯಲ್ಲಿ 1,505 ಹುದ್ದೆಗಳ ಬೃಹತ್ ನೇಮಕಾತಿ: ಪ್ರಾಥಮಿಕ ಆರೋಗ್ಯ ಸುರಕ್ಷಾಧಿಕಾರಿ ಮತ್ತು ಹೆಲ್ತ್ ಇನ್ಸ್‌ಪೆಕ್ಟರ್ ವಿಶೇಷ ನಿಯಮಾವಳಿ ಪ್ರಕಟ!
ನರ್ಸಿಂಗ್ ಹಾಗೂ ಪ್ಯಾರಾಮೆಡಿಕಲ್ ಮುಗಿಸಿ ಸರ್ಕಾರಿ ಉದ್ಯೋಗಕ್ಕಾಗಿ ಕಾಯುತ್ತಿರುವ ಕರ್ನಾಟಕದ ಯುವಜನತೆಗೆ ರಾಜ್ಯ ಸರ್ಕಾರ ಭರ್ಜರಿ ಸಿಹಿಸುದ್ದಿ ನೀಡಿದೆ. ರಾಜ್ಯದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸೇವೆಗಳ ಇಲಾಖೆಯಲ್ಲಿ ಖಾಲಿ ಇರುವ ಬರೋಬ್ಬರಿ 1,505 ಹುದ್ದೆಗಳ ಭರ್ತಿಗೆ ವೇದಿಕೆ ಸಿದ್ಧವಾಗಿದೆ.
ಈ ಬಹುನಿರೀಕ್ಷಿತ ಆರೋಗ್ಯ ಇಲಾಖೆ ನೇಮಕಾತಿ 2026 ಪ್ರಕ್ರಿಯೆಯನ್ನು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ (KEA) ಮೂಲಕ ನಡೆಸಲು ತೀರ್ಮಾನಿಸಲಾಗಿದ್ದು, ಇದಕ್ಕಾಗಿ ಸರ್ಕಾರ "ವಿಶೇಷ ನೇಮಕಾತಿ ನಿಯಮಗಳು - 2026" ಕರಡು ಅಧಿಸೂಚನೆಯನ್ನು ಆಗಸ್ಟ್ 20ರಂದು ಅಧಿಕೃತ ರಾಜ್ಯಪತ್ರದಲ್ಲಿ ಪ್ರಕಟಿಸಿದೆ.
ಹೊಸ ವಿಶೇಷ ನಿಯಮಗಳ ಅನ್ವಯ 1,205 ಪ್ರಾಥಮಿಕ ಆರೋಗ್ಯ ಸುರಕ್ಷಾಧಿಕಾರಿ (PHCO) ಹಾಗೂ 300 ಹೆಲ್ತ್ ಇನ್ಸ್ ಪೆಕ್ಟಿಂಗ್ ಆಫೀಸರ್ (HIO) ಹುದ್ದೆಗಳನ್ನು ನೇರ ಸ್ಪರ್ಧಾತ್ಮಕ ಪರೀಕ್ಷೆಯ ಮೂಲಕ ತುಂಬಿಕೊಳ್ಳಲಾಗುತ್ತಿದೆ. ಈ ಪರೀಕ್ಷೆಯ ಪಠ್ಯಕ್ರಮ, ವಯೋಮಿತಿ, ಗುತ್ತಿಗೆ ನೌಕರರಿಗೆ ಸಿಗುವ ಬೋನಸ್ ಅಂಕಗಳು ಹಾಗೂ ಆಯ್ಕೆ ಪ್ರಕ್ರಿಯೆಯ ಸಂಪೂರ್ಣ ಚಿತ್ರಣವನ್ನು ಈ ಲೇಖನದಲ್ಲಿ ಸರಳವಾಗಿ ವಿವರಿಸಲಾಗಿದೆ.
ಆರೋಗ್ಯ ಇಲಾಖೆ ನೇಮಕಾತಿ 2026: ಪ್ರಮುಖ ಮುಖ್ಯಾಂಶಗಳು
- ಇಲಾಖೆಯ ಹೆಸರು : ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸೇವೆಗಳ ನಿರ್ದೇಶನಾಲಯ, ಕರ್ನಾಟಕ
- ಒಟ್ಟು ಹುದ್ದೆಗಳ ಸಂಖ್ಯೆ : 1,505 ಹುದ್ದೆಗಳು
- ಹುದ್ದೆಗಳ ಹೆಸರು : ಪ್ರಾಥಮಿಕ ಆರೋಗ್ಯ ಸುರಕ್ಷಾಧಿಕಾರಿ (PHCO) & ಹೆಲ್ತ್ ಇನ್ಸ್‌ಪೆಕ್ಟಿಂಗ್ ಆಫೀಸರ್ (HIO)
- ವೇತನ ಶ್ರೇಣಿ : ₹37,500 ದಿಂದ ₹76,100/-
- ಪರೀಕ್ಷಾ ಪ್ರಾಧಿಕಾರ : ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA)
- ಆಯ್ಕೆ ವಿಧಾನ : ಲಿಖಿತ ಪರೀಕ್ಷೆ (160 ಅಂಕ) + ಪ್ರಾಕ್ಟಿಕಲ್ ಪರೀಕ್ಷೆ (40 ಅಂಕ)
- ಸಂದರ್ಶನ : ಯಾವುದೇ ಮೌಖಿಕ ಸಂದರ್ಶನ ಇರುವುದಿಲ್ಲ (No Interview)
ಹುದ್ದೆಗಳ ವಿವರ ಹಾಗೂ ಶೈಕ್ಷಣಿಕ ಅರ್ಹತೆ
ಈ ಬೃಹತ್ ನೇಮಕಾತಿಯಲ್ಲಿ ಎರಡು ಪ್ರಮುಖ ಹುದ್ದೆಗಳಿದ್ದು, ಶೈಕ್ಷಣಿಕ ಅರ್ಹತೆಯ ವಿವರ ಈ ಕೆಳಗಿನಂತಿದೆ:
1. ಪ್ರಾಥಮಿಕ ಆರೋಗ್ಯ ಸುರಕ್ಷಾಧಿಕಾರಿ (PHCO) - 1,205 ಹುದ್ದೆಗಳು
ಈ ಹುದ್ದೆಗಳನ್ನು ಕೇವಲ ಮಹಿಳಾ ಅಭ್ಯರ್ಥಿಗಳಿಗೆ ಮಾತ್ರ ಮೀಸಲಿಡಲಾಗಿದೆ.
ಎಸ್ಎಸ್ಎಲ್ ಸಿ (SSLC) ಯಲ್ಲಿ ಉತ್ತೀರ್ಣರಾಗಿರಬೇಕು.
ಜೂನಿಯರ್ ಹೆಲ್ತ್ ವರ್ಕರ್ (ANM) ತರಬೇತಿ ಅಥವಾ ಜಿಎನ್ಎಂ ನರ್ಸಿಂಗ್ (GNM) ಡಿಪ್ಲೊಮಾ, ಬಿ.ಎಸ್ಸಿ ನರ್ಸಿಂಗ್ ಅಥವಾ ಸೈಕಿಯಾಟ್ರಿಕ್ ನರ್ಸಿಂಗ್ ಮುಗಿಸಿರಬೇಕು.
ಕರ್ನಾಟಕ ನರ್ಸಿಂಗ್ ಕೌನ್ಸಿಲ್ (KNC) ನಲ್ಲಿ ಕಡ್ಡಾಯವಾಗಿ ನೊಂದಣಿ ಮಾಡಿಸಿರಬೇಕು.
2. ಹೆಲ್ತ್ ಇನ್ಸ್ ಪೆಕ್ಟಿಂಗ್ ಆಫೀಸರ್ (HIO) - 300 ಹುದ್ದೆಗಳು
ಎಸ್ಎಸ್ಎಲ್ ಸಿ ಪಾಸಾಗಿ JOC ಮಲ್ಟಿಪರ್ಪಸ್ ಬೇಸಿಕ್ ಹೆಲ್ತ್ ವರ್ಕರ್ ನ 2 ವರ್ಷಗಳ ಡಿಪ್ಲೊಮಾ ಮಾಡಿರಬೇಕು ಅಥವಾ
ಪ್ಯಾರಾಮೆಡಿಕಲ್ ಬೋರ್ಡ್ ನಿಂದ 3 ವರ್ಷದ ಹೆಲ್ತ್ ಇನ್ಸ್‌ಪೆಕ್ಟರ್ ಡಿಪ್ಲೊಮಾ ಮುಗಿಸಿರಬೇಕು ಅಥವಾ
ಪಿಯುಸಿ ವಿಜ್ಞಾನ (PCMB) ಓದಿ, 2 ವರ್ಷದ ಹೆಲ್ತ್ ಇನ್ಸ್‌ಪೆಕ್ಟರ್ ಡಿಪ್ಲೊಮಾ ಪಡೆದಿರಬೇಕು ಅಥವಾ
ಜಿಎನ್ಎಂ ಅಥವಾ ಬಿ.ಎಸ್ಸಿ ನರ್ಸಿಂಗ್ ಪದವಿ ಹೊಂದಿರಬೇಕು.
ಗಮನಿಸಿ: ಈ ಹುದ್ದೆಗಳಿಗೆ ಸ್ಪರ್ಧಾತ್ಮಕ ಪರೀಕ್ಷೆ ಬರೆಯಲು, ಮೇಲಿನ ಅರ್ಹತಾ ಪರೀಕ್ಷೆಯಲ್ಲಿ ಕನಿಷ್ಠ 50% ಗಿಂತ ಹೆಚ್ಚು ಅಂಕ ಪಡೆದಿರುವುದು ಕಡ್ಡಾಯ.
ವಯಸ್ಸಿನ ಮಿತಿ ಹಾಗೂ ಗುತ್ತಿಗೆ ನೌಕರರಿಗೆ ವಿಶೇಷ ರಿಯಾಯಿತಿ
ಈ ನೇಮಕಾತಿಯಲ್ಲಿ ಸಾಮಾನ್ಯ ವಯೋಮಿತಿಗಿಂತ ಎಲ್ಲಾ ವರ್ಗದ ಅಭ್ಯರ್ಥಿಗಳಿಗೂ 3 ವರ್ಷಗಳ ಹೆಚ್ಚುವರಿ ಸಡಿಲಿಕೆ ನೀಡಲಾಗಿದೆ.
ಗುತ್ತಿಗೆ ನೌಕರರಿಗೆ ವಯೋಮಿತಿ ವಿನಾಯಿತಿ: ಆರೋಗ್ಯ ಇಲಾಖೆ, ವೈದ್ಯಕೀಯ ಶಿಕ್ಷಣ ಇಲಾಖೆ ಅಥವಾ ಎನ್ಎಚ್ಎಂ (NHM/NRHM) ಅಡಿಯಲ್ಲಿ ಕೆಲಸ ಮಾಡಿದ ಗುತ್ತಿಗೆ ನೌಕರರಿಗೆ ಪ್ರತಿ ವರ್ಷದ ಸೇವೆಗೆ 1 ವರ್ಷದಂತೆ ಗರಿಷ್ಠ 10 ವರ್ಷಗಳ ವಯೋಮಿತಿ ಸಡಿಲಿಕೆ ಸಿಗಲಿದೆ. (ಆದರೆ ಗರಿಷ್ಠ ವಯಸ್ಸು 50 ವರ್ಷ ಮೀರುವಂತಿಲ್ಲ).
ಗುತ್ತಿಗೆ ನೌಕರರಿಗೆ ಕೃಪಾಂಕ (Weightage): ಸರ್ಕಾರಿ ಆಸ್ಪತ್ರೆ ಅಥವಾ ಆರೋಗ್ಯ ಕೇಂದ್ರಗಳಲ್ಲಿ ಗುತ್ತಿಗೆ ಆಧಾರದ ಮೇಲೆ ದುಡಿದ ಸಿಬ್ಬಂದಿಗೆ ಪ್ರತಿ ಒಂದು ವರ್ಷದ ಸೇವೆಗೆ 1 ಅಂಕದಂತೆ ಗರಿಷ್ಠ 5 ಕೃಪಾಂಕಗಳನ್ನು ನೀಡಲಾಗುತ್ತದೆ. ಈ ಅಂಕಗಳನ್ನು ಪರೀಕ್ಷೆಯ ಒಟ್ಟು ಅಂಕಗಳಿಗೆ ಸೇರಿಸಿ ಮೆರಿಟ್ ಲಿಸ್ಟ್ ಮಾಡಲಾಗುತ್ತದೆ.
ಪ್ರಚಲಿತ ಘಟನೆಗಳ ಆಧಾರಿತ ಪ್ರತಿದಿನದ ಹಾಗೂ ವಾರಾಂತ್ಯದ ಕ್ವಿಜ್ ನಲ್ಲಿ ಭಾಗವಹಿಸಲು ಇಲ್ಲಿ ಕ್ಲಿಕ್ ಮಾಡಿ
ಕೆಇಎ ಪರೀಕ್ಷಾ ಮಾದರಿ ಹಾಗೂ ಪಠ್ಯಕ್ರಮ
ಕೆಇಎ ನಡೆಸುವ ಈ ಸ್ಪರ್ಧಾತ್ಮಕ ಪರೀಕ್ಷೆಯು ಲಿಖಿತ ಹಾಗೂ ಪ್ರಾಕ್ಟಿಕಲ್ ಸೇರಿ ಒಟ್ಟು 200 ಅಂಕಗಳಿಗೆ ನಡೆಯಲಿದೆ.
ಅ) ಲಿಖಿತ ಪರೀಕ್ಷೆ (160 ಅಂಕಗಳು): ಇದು ಸಂಪೂರ್ಣ ಬಹು ಆಯ್ಕೆಯ (MCQ) ಪ್ರಶ್ನೆಗಳನ್ನು ಒಳಗೊಂಡಿರುತ್ತದೆ.
- ಪತ್ರಿಕೆ-1 (80 ಅಂಕ): ತಾಯಿ ಮತ್ತು ಮಕ್ಕಳ ಆರೋಗ್ಯ (10 ಅಂಕ), ರಾಷ್ಟ್ರೀಯ ಹಾಗೂ ರಾಜ್ಯ ಆರೋಗ್ಯ ಕಾರ್ಯಕ್ರಮಗಳು (20 ಅಂಕ), ಸಾಮಾನ್ಯ ಜ್ಞಾನ (20 ಅಂಕ), ಸಾಮಾನ್ಯ ಇಂಗ್ಲಿಷ್ (20 ಅಂಕ) ಹಾಗೂ ಮೂಲಭೂತ ನರ್ಸಿಂಗ್ ಕಾನ್ಸೆಪ್ಟ್ಸ್ (10 ಅಂಕ).
- ಪತ್ರಿಕೆ-2 (80 ಅಂಕ): ಸಮುದಾಯ ಆರೋಗ್ಯ ನರ್ಸಿಂಗ್ ಮತ್ತು ಆರೋಗ್ಯ ಉತ್ತೇಜನ (20), ಪ್ರೈಮರಿ ಹೆಲ್ತ್ ಕೇರ್ ನರ್ಸಿಂಗ್ (10), ಮನೋವಿಜ್ಞಾನ (10), ನ್ಯೂಟ್ರಿಷನ್ & ಬಯೋಕೆಮಿಸ್ಟ್ರಿ (10), ಅನಾಟಮಿ & ಫಿಸಿಯಾಲಜಿ (10), ಆರೋಗ್ಯ ಕೇಂದ್ರ ನಿರ್ವಹಣೆ (20 ಅಂಕ).
ಆ) ಪ್ರಾಕ್ಟಿಕಲ್ ಪರೀಕ್ಷೆ (40 ಅಂಕಗಳು): ಲಿಖಿತ ಪರೀಕ್ಷೆಯಲ್ಲಿ ಪಡೆದ ಅಂಕಗಳ ಆಧಾರದ ಮೇಲೆ 1:3 ಅನುಪಾತದಲ್ಲಿ ಅಭ್ಯರ್ಥಿಗಳನ್ನು ಪ್ರಾಕ್ಟಿಕಲ್ ಪರೀಕ್ಷೆಗೆ ಕರೆಯಲಾಗುತ್ತದೆ. ಕ್ಲಿನಿಕಲ್ ಸಾಮರ್ಥ್ಯ ಪರೀಕ್ಷಿಸಲು ಆರೋಗ್ಯ ಇಲಾಖೆಯಿಂದಲೇ OSCE (Objective Structured Clinical Examination) ಮಾದರಿಯಲ್ಲಿ ಈ ಪರೀಕ್ಷೆ ನಡೆಯುತ್ತದೆ.
ಕಡ್ಡಾಯ ಕನ್ನಡ ಭಾಷಾ ಪರೀಕ್ಷೆ
ಬೇರೆಲ್ಲಾ ಕೆಇಎ ಪರೀಕ್ಷೆಗಳಂತೆ ಇಲ್ಲೂ 150 ಅಂಕಗಳ ಕಡ್ಡಾಯ ಕನ್ನಡ ಪರೀಕ್ಷೆ ಇರುತ್ತದೆ. ಇದರಲ್ಲಿ ಕನಿಷ್ಠ 50 ಅಂಕ ಪಡೆದು ಪಾಸ್ ಆಗುವುದು ಅನಿವಾರ್ಯ. (ಎಸ್ಎಸ್ಎಲ್ ಸಿ ಯಲ್ಲಿ ಕನ್ನಡವನ್ನು ಪ್ರಥಮ ಅಥವಾ ದ್ವಿತೀಯ ಭಾಷೆಯಾಗಿ ಓದಿದವರಿಗೆ ಈ ಪರೀಕ್ಷೆಯಿಂದ ವಿನಾಯಿತಿ ಇರುತ್ತದೆ).
75% ಹೆಚ್ಚುವರಿ ಪಟ್ಟಿ (ವೇಟಿಂಗ್ ಲಿಸ್ಟ್)
ಆಯ್ಕೆ ಸಮಿತಿಯು ಮುಖ್ಯ ಪಟ್ಟಿಯ ಜೊತೆಗೆ ಒಟ್ಟು ಹುದ್ದೆಗಳ ಶೇಕಡಾ 75 ರಷ್ಟು ಅಭ್ಯರ್ಥಿಗಳ ಬೃಹತ್ ಹೆಚ್ಚುವರಿ ಪಟ್ಟಿಯನ್ನು (ವೇಟಿಂಗ್ ಲಿಸ್ಟ್) ಸಿದ್ಧಪಡಿಸಲಿದೆ. ಕೆಲಸಕ್ಕೆ ಆಯ್ಕೆಯಾದವರು ಹಾಜರಾಗದಿದ್ದರೆ, ಆ ಜಾಗಕ್ಕೆ ವೇಟಿಂಗ್ ಲಿಸ್ಟ್ ನಲ್ಲಿರುವ ಅದೇ ವರ್ಗದ ಅಭ್ಯರ್ಥಿಯನ್ನು ನೇಮಕ ಮಾಡಲಾಗುತ್ತದೆ.