Job Description: ➤ ದೇಶದಲ್ಲಿ ಸಂಕುಚಿತ ಜೈವಿಕ ಅನಿಲ (Compressed Biogas - CBG) ಉತ್ಪಾದನೆಯನ್ನು ಗಮನಾರ್ಹವಾಗಿ ಹೆಚ್ಚಿಸುವ ಉದ್ದೇಶದಿಂದ ಕೇಂದ್ರ ಸಚಿವ ಸಂಪುಟವು ₹23,731 ಕೋಟಿ ವೆಚ್ಚದ 'ಗೋಬರ್ ಧನ್' (National Circular Bioenergy Scheme) ಯೋಜನೆಗೆ ಅನುಮೋದನೆ ನೀಡಿದೆ.➤ ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವ ಅಶ್ವಿನಿ ವೈಷ್ಣವ್ ಅವರು ಘೋಷಿಸಿದಂತೆ, ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದ ಉಸ್ತುವಾರಿಯಲ್ಲಿ 2026-27 ರಿಂದ 2035-36ರವರೆಗಿನ 10 ವರ್ಷಗಳ ಅವಧಿಯಲ್ಲಿ ಅನುಷ್ಠಾನಗೊಳ್ಳಲಿರುವ ಈ ಯೋಜನೆಯ ಮುಖ್ಯ ಗುರಿ, ಜೈವಿಕ ತ್ಯಾಜ್ಯದಿಂದ ಸ್ವಚ್ಛ ಇಂಧನ ತಯಾರಿಸಿ ಸಿಬಿಜಿ (CBG) ಉತ್ಪಾದನೆಯನ್ನು 10 ಪಟ್ಟು ಹೆಚ್ಚಿಸುವುದಾಗಿದೆ.➤ ಕೃಷಿ, ಸಗಣಿ ಹಾಗೂ ಪೌರಸಭೆಯ ಜೈವಿಕ ತ್ಯಾಜ್ಯಗಳನ್ನು ಸ್ವಚ್ಛ ಇಂಧನ ಮತ್ತು ಸಾವಯವ ಗೊಬ್ಬರವಾಗಿ ಪರಿವರ್ತಿಸಿ, ₹40,000 ಕೋಟಿಗೂ ಹೆಚ್ಚು ವಿದೇಶಿ ವಿನಿಮಯವನ್ನು ಉಳಿಸುವುದು, ₹75,000 ಕೋಟಿ ಮೌಲ್ಯದ ಜೈವಿಕ ಇಂಧನ ಕ್ಷೇತ್ರದಲ್ಲಿ ಬೃಹತ್ ಖಾಸಗಿ ಹೂಡಿಕೆಯನ್ನು ಆಕರ್ಷಿಸುವುದು ಮತ್ತು ಗ್ರಾಮೀಣ ಪ್ರದೇಶಗಳಲ್ಲಿ 1.5 ಲಕ್ಷ ಹೊಸ ಉದ್ಯೋಗಗಳನ್ನು ಸೃಷ್ಟಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶಗಳಾಗಿವೆ. ➤ ಯೋಜನೆಯ 6 ಮುಖ್ಯ ಸ್ತಂಭಗಳು: ನಿಶ್ಚಿತ ಮಾರುಕಟ್ಟೆ (Assured Offtake): ನಗರ ಅನಿಲ ವಿತರಣಾ (CGD) ಕಂಪನಿಗಳು ನಿಯಮಿತ ಪ್ರಮಾಣದಲ್ಲಿ CBG ಖರೀದಿಸುವುದನ್ನು ಕಡ್ಡಾಯಗೊಳಿಸಲಾಗಿದೆ. 2026-27ರಲ್ಲಿ: 3% ಮಿಶ್ರಣ 2027-28ರಲ್ಲಿ: 4% ಮಿಶ್ರಣ 2028-29 ರಿಂದ ಮುಂದೆ: 5% ಮಿಶ್ರಣ ಕಡ್ಡಾಯ ಸ್ಥಿರ ಬೆಲೆ ಚೌಕಟ್ಟು (Stable Pricing): ಹೂಡಿಕೆದಾರರಿಗೆ ಆರ್ಥಿಕ ಭದ್ರತೆ ನೀಡಲು 10 ವರ್ಷಗಳ ಅವಧಿಗೆ ಪ್ರತಿ MMBTU ಗೆ ₹2,110 ನಷ್ಟು ಆಡಳಿತಾತ್ಮಕ ಬೆಲೆಯನ್ನು (Administered Price) ನಿಗದಿಪಡಿಸಲಾಗಿದೆ. ಬಂಡವಾಳ ನೆರವು (Capital Assistance): ಹೊಸದಾಗಿ ಸ್ಥಾಪಿಸುವ ಗ್ರೀನ್‌ಫೀಲ್ಡ್ ಯೋಜನೆಗಳಿಗೆ ದಿನಕ್ಕೆ 1 ಟನ್ ಉತ್ಪಾದನಾ ಸಾಮರ್ಥ್ಯಕ್ಕೆ (1 TPD) ಗರಿಷ್ಠ ₹2 ಕೋಟಿವರೆಗೆ ನೆರವು ಸಿಗಲಿದೆ. ಪೈಪ್‌ಲೈನ್ ಮೂಲಸೌಕರ್ಯ (Pipeline Connectivity): ಜೈವಿಕ ಅನಿಲ ಘಟಕಗಳನ್ನು ಮುಖ್ಯ ಅನಿಲ ಪೈಪ್‌ಲೈನ್‌ ಜಾಲಕ್ಕೆ ಜೋಡಿಸಲು ಹಣಕಾಸಿನ ನೆರವು ನೀಡಲಾಗುತ್ತದೆ. ಕ್ರೆಡಿಟ್ ಗ್ಯಾರಂಟಿ (Credit Support): ಸಣ್ಣ ಮತ್ತು ಮಧ್ಯಮ ಪ್ರಮಾಣದ (MSME) ಉದ್ಯಮಿಗಳಿಗೆ ಬ್ಯಾಂಕ್ ಸಾಲ ಸುಲಭವಾಗಿ ದೊರೆಯಲು ಸಾಲ ಖಾತರಿ ವ್ಯವಸ್ಥೆ ಕಲ್ಪಿಸಲಾಗಿದೆ. ಪರಿಸರ ವ್ಯವಸ್ಥೆಯ ಅಭಿವೃದ್ಧಿ (Ecosystem Challenge Fund): ತಂತ್ರಜ್ಞಾನ ನಾವೀನ್ಯತೆ ಹಾಗೂ ಜೈವಿಕ ತ್ಯಾಜ್ಯ ಸಂಗ್ರಹಣೆ ವ್ಯವಸ್ಥೆಯನ್ನು ಬಲಪಡಿಸುವುದು.
