Job Description: * ಜಾಗತಿಕವಾಗಿ ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರ ವೇಗವಾಗಿ ವಿಸ್ತರಿಸುತ್ತಿದ್ದು, ಈ ಸ್ಪರ್ಧೆಯಲ್ಲಿ ಭಾರತ ಮಹತ್ವದ ಸಾಧನೆ ಮಾಡಿದೆ. ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯ ಬಿಡುಗಡೆ ಮಾಡಿದ ‘2025 ಗ್ಲೋಬಲ್ ಎಐ ವೈಬ್ರನ್ಸಿ ಟೂಲ್’ ವರದಿ ಪ್ರಕಾರ, ಭಾರತವು ಎಐ ಅಭಿವೃದ್ಧಿ ಮತ್ತು ಬಳಕೆಯಲ್ಲಿ ಜಾಗತಿಕವಾಗಿ ಮೂರನೇ ಸ್ಥಾನ ಪಡೆದಿದೆ. 2023ರಲ್ಲಿ 7ನೇ ಸ್ಥಾನದಲ್ಲಿದ್ದ ಭಾರತ, ಒಂದೇ ವರ್ಷದಲ್ಲಿ ನಾಲ್ಕು ಸ್ಥಾನಗಳಷ್ಟು ಏರಿಕೆ ಕಂಡಿದೆ.* ಈ ಶ್ರೇಯಾಂಕವನ್ನು ಸಂಶೋಧನೆ ಮತ್ತು ಅಭಿವೃದ್ಧಿ, ಜವಾಬ್ದಾರಿಯುತ ಎಐ ನಡವಳಿಕೆ, ಆರ್ಥಿಕತೆ, ಕೌಶಲ್ಯಾಭಿವೃದ್ಧಿ, ನೀತಿ ಅನುಷ್ಠಾನ, ಸಾರ್ವಜನಿಕ ಅಭಿಪ್ರಾಯ ಹಾಗೂ ಮೂಲಸೌಕರ್ಯ ಸೇರಿದಂತೆ ಹಲವು ಅಂಶಗಳ ಆಧಾರದಲ್ಲಿ ನಿಗದಿಪಡಿಸಲಾಗಿದೆ.* ಅಗ್ರ ಮೂರು ದೇಶಗಳು: 1. ಪ್ರಥಮ ಸ್ಥಾನ – ಯುನೈಟೆಡ್ ಸ್ಟೇಟ್ಸ್ (78.60 ಅಂಕಗಳು): ಸಂಶೋಧನೆ ಮತ್ತು ಅಭಿವೃದ್ಧಿ, ಖಾಸಗಿ ಹೂಡಿಕೆ, ಎಐ ಮಾದರಿ ಉತ್ಪಾದನೆ, ಕಂಪ್ಯೂಟ್ ಸಾಮರ್ಥ್ಯ ಮತ್ತು ಮೂಲಸೌಕರ್ಯದಲ್ಲಿ ಮುಂಚೂಣಿಯಲ್ಲಿದೆ. ಜೆಮಿನಿ 2.0 ಪ್ರೊ, ಲಾಮಾ 3.1 ಮುಂತಾದ ಉನ್ನತ ಎಐ ಮಾದರಿಗಳು ಗಮನಾರ್ಹ.2. ಎರಡನೇ ಸ್ಥಾನ – ಚೀನಾ (36.95 ಅಂಕಗಳು):ಎಐ ಸಂಶೋಧನಾ ಪ್ರಕಟಣೆಗಳು, ಉಲ್ಲೇಖಗಳು, ಪೇಟೆಂಟ್‌ಗಳು ಹಾಗೂ ಡೀಪ್‌ಕ್‌ನಂತಹ ಮಾದರಿಗಳ ಉಡಾವಣೆಯಲ್ಲಿ ಪ್ರಾಬಲ್ಯ ಹೊಂದಿದೆ. ಸರ್ಕಾರದ ತಂತ್ರದ ಮೂಲಕ ಆರ್ಥಿಕತೆಯಾದ್ಯಂತ ಎಐ ಬಳಕೆಯನ್ನು ವಿಸ್ತರಿಸಿದೆ.3. ಮೂರನೇ ಸ್ಥಾನ – ಭಾರತ (21.59 ಅಂಕಗಳು): ಎಐ ಪರಿಸರ ವ್ಯವಸ್ಥೆ ಬಲಪಡಿಸುವುದು, ನೀತಿ ಬೆಂಬಲ, ಪ್ರತಿಭಾ ಅಭಿವೃದ್ಧಿ, ಸಂಶೋಧನೆ ಮತ್ತು ಹೊಸ ಉತ್ಪನ್ನಗಳ ಸೃಷ್ಟಿಯಲ್ಲಿ ಭಾರತ ಗಮನಾರ್ಹ ಮುನ್ನಡೆ ಸಾಧಿಸಿದೆ.* ಭಾರತದಲ್ಲಿ ಎಐ ಸಂಶೋಧನೆ ಮತ್ತು ಅಭಿವೃದ್ಧಿ ಚಟುವಟಿಕೆಗಳು ವೇಗ ಪಡೆದಿವೆ. ಹೊಸ ಉತ್ಪನ್ನಗಳು, ಪೇಟೆಂಟ್ ಚಟುವಟಿಕೆಗಳು, ಎಐಗೆ ಬಂದ ಹೂಡಿಕೆಗಳು, ಉದ್ಯೋಗಾವಕಾಶಗಳ ಹೆಚ್ಚಳ ಮತ್ತು ಶಿಕ್ಷಣ ವ್ಯವಸ್ಥೆಯ ಮೂಲಕ ಕೌಶಲ್ಯಾಭಿವೃದ್ಧಿ ಈ ಏರಿಕೆಗೆ ಕಾರಣವಾಗಿದೆ. ಜೊತೆಗೆ, ಜವಾಬ್ದಾರಿಯುತ ಎಐ ಮಾನದಂಡಗಳನ್ನು ಅಳವಡಿಸಿಕೊಳ್ಳುವ ಪ್ರಯತ್ನಗಳು ಸಾರ್ವಜನಿಕ ನಂಬಿಕೆಯನ್ನು ಹೆಚ್ಚಿಸಿವೆ. ಆದರೆ, ನೀತಿ ನಿರ್ಧಾರಗಳ ಅನುಷ್ಠಾನದಲ್ಲಿ ಭಾರತವು ಕೆಲವು ಸ್ಥಾನಗಳನ್ನು ಕಳೆದುಕೊಂಡಿದೆ ಎಂಬುದು ವರದಿಯಲ್ಲಿದೆ.* ವಿವಿಧ ರಾಷ್ಟ್ರಗಳು ಎಐ ಕ್ಷೇತ್ರಕ್ಕೆ ಭಾರೀ ಹೂಡಿಕೆ ಘೋಷಿಸಿವೆ. ಕೆನಡಾ, ಚೀನಾ, ಫ್ರಾನ್ಸ್, ಸೌದಿ ಅರೇಬಿಯಾ ಸೇರಿದಂತೆ ಹಲವು ದೇಶಗಳು ಸಾವಿರಾರು ಕೋಟಿ ರೂಪಾಯಿ ಮೌಲ್ಯದ ಹೂಡಿಕೆ ಮಾಡುತ್ತಿದ್ದರೆ, ಭಾರತವೂ ಸುಮಾರು 1.25 ಬಿಲಿಯನ್ ಡಾಲರ್ (ರೂ. 11,250 ಕೋಟಿ) ಹೂಡಿಕೆ ಘೋಷಿಸಿದೆ.* ದಕ್ಷಿಣ ಕೊರಿಯಾ (4ನೇ), ಯುನೈಟೆಡ್ ಕಿಂಗ್‌ಡಮ್ (5ನೇ), ಸಿಂಗಾಪುರ, ಸ್ಪೇನ್, ಯುಎಇ ಮತ್ತು ಜಪಾನ್ ಕೂಡ ಎಐ ಸ್ಪರ್ಧೆಯಲ್ಲಿ ಪ್ರಮುಖ ಸ್ಥಾನದಲ್ಲಿವೆ.* ಎಐ ರೇಸ್‌ನಲ್ಲಿ ಭಾರತ 7 ರಿಂದ 3ನೇ ಸ್ಥಾನಕ್ಕೆ ಜಿಗಿದಿರುವುದು ದೇಶದ ತಾಂತ್ರಿಕ ಶಕ್ತಿ, ಪ್ರತಿಭಾ ಸಂಪತ್ತು ಮತ್ತು ಭವಿಷ್ಯದ ಡಿಜಿಟಲ್ ಆರ್ಥಿಕತೆಗೆ ಬಲವಾದ ಸೂಚಕವಾಗಿದೆ.
