➤ "ಕಾಡಿದ್ದರೆ ನಾಡು" ಎಂಬ ನಾಣ್ಣುಡಿ ಸಾರ್ವಕಾಲಿಕ ಸತ್ಯ. ಭೂಮಿಯ ಮೇಲಿನ ಪ್ರತಿ ಜೀವಿಯ ಉಸಿರಾಟಕ್ಕೆ ಮೂಲ ಕಾರಣವಾಗಿರುವ ಅರಣ್ಯಗಳನ್ನು ಸಂರಕ್ಷಿಸುವ ನಿಟ್ಟಿನಲ್ಲಿ ಪ್ರತಿವರ್ಷ ಮಾರ್ಚ್ 21 ರಂದು 'ಅಂತಾರಾಷ್ಟ್ರೀಯ ಅರಣ್ಯ ದಿನ' (International Day of Forests) ವನ್ನು ಆಚರಿಸಲಾಗುತ್ತದೆ. 
ಅಂತಾರಾಷ್ಟ್ರೀಯ ಅರಣ್ಯ ದಿನ 2026ರ ಧ್ಯೇಯವಾಕ್ಯ (Theme): ಅರಣ್ಯ ಮತ್ತು ಸುಸ್ಥಿರ ಆರ್ಥಿಕತೆ
➤ ದೈನಂದಿನ ಜೀವನದಲ್ಲಿ ಅರಣ್ಯ ಸಂಪನ್ಮೂಲಗಳ ಪಾತ್ರ ಮತ್ತು ಕಾಡುಗಳ ನಾಶದಿಂದ ಉಂಟಾಗುವ ದುಷ್ಪರಿಣಾಮಗಳ ಬಗ್ಗೆ ಜಾಗೃತಿ ಮೂಡಿಸಲು ಈ ದಿನವನ್ನು ಆಚರಿಸಲಾಗುತ್ತಿದೆ. 1971ರ ನವೆಂಬರ್‌ನಲ್ಲಿ ನಡೆದ ಆಹಾರ ಮತ್ತು ಕೃಷಿ ಸಂಸ್ಥೆಯ (FAO) 16ನೇ ಸಮ್ಮೇಳನದಲ್ಲಿ ಈ ದಿನದ ಆಚರಣೆಗೆ ನಾಂದಿ ಹಾಡಲಾಯಿತು.  2012ರ ನವೆಂಬರ್ 28ರಂದು ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯು ಮಾರ್ಚ್ 21ನ್ನು ಅಂತಾರಾಷ್ಟ್ರೀಯ ಅರಣ್ಯ ದಿನವನ್ನಾಗಿ ಘೋಷಿಸಿತು. ಅಂದಿನಿಂದ ಪ್ರತಿವರ್ಷ ವಿಶ್ವಸಂಸ್ಥೆಯು ಈ ದಿನಾಚರಣೆಯನ್ನು ಅಧಿಕೃತವಾಗಿ ನಡೆಸುತ್ತಿದೆ. 
➤ ಅರಣ್ಯಗಳ ಕುರಿತ ಪ್ರಮುಖ ಅಂಕಿ-ಅಂಶಗಳು:
- ಜೀವವೈವಿಧ್ಯ: ಭೂಮಿಯ ಮೇಲಿನ ಸುಮಾರು ಶೇ. 80ಕ್ಕೂ ಹೆಚ್ಚು ಭೂಚರ ಜೀವವೈವಿಧ್ಯಗಳು ಕಾಡುಗಳಲ್ಲಿ ವಾಸಿಸುತ್ತಿವೆ.
- ಜೀವನೋಪಾಯ: ವಿಶ್ವಸಂಸ್ಥೆಯ ಪ್ರಕಾರ, ಜಗತ್ತಿನ ಸುಮಾರು 160 ಕೋಟಿ ಜನರು ಆಹಾರ, ಆಶ್ರಯ ಮತ್ತು ಆದಾಯಕ್ಕಾಗಿ ನೇರವಾಗಿ ಅರಣ್ಯವನ್ನೇ ಅವಲಂಬಿಸಿದ್ದಾರೆ.
- ವ್ಯಾಪ್ತಿ: ಪ್ರಪಂಚದ ಒಟ್ಟು ಭೂಪ್ರದೇಶದ ಶೇ. 31ರಷ್ಟು ಭಾಗ ಅರಣ್ಯದಿಂದ ಆವೃತವಾಗಿದೆ.
- ಸಮತೋಲನ: ಪರಿಸರ ಸಮತೋಲನ ಕಾಪಾಡಲು ಒಂದು ದೇಶದ ಒಟ್ಟು ಭೂಭಾಗದ ಕನಿಷ್ಠ ಶೇ. 33ರಷ್ಟು ಅರಣ್ಯ ಇರಬೇಕು ಎಂಬ ನಿಯಮವಿದೆ.
➤ ಜಾಗತಿಕ ತಾಪಮಾನ ಏರಿಕೆಯನ್ನು (Global Warming) ತಡೆಯುವಲ್ಲಿ ಮರಗಳು ಪ್ರಮುಖ ಪಾತ್ರ ವಹಿಸುತ್ತವೆ. ವಾತಾವರಣದಲ್ಲಿನ ಅತಿಯಾದ ಇಂಗಾಲದ ಡೈ ಆಕ್ಸೈಡ್ ಅನ್ನು ಹೀರಿಕೊಂಡು ಹಸಿರುಮನೆ ಅನಿಲಗಳ ಪರಿಣಾಮವನ್ನು ಮರಗಳು ಕಡಿಮೆ ಮಾಡುತ್ತವೆ. ಅರಣ್ಯನಾಶದಿಂದಾಗಿ ಪ್ರತಿವರ್ಷ ಅಪಾರ ಪ್ರಮಾಣದ ಕಾರ್ಬನ್ ಡೈ ಆಕ್ಸೈಡ್ ಹೊರಸೂಸುವಿಕೆ ಹೆಚ್ಚಾಗುತ್ತಿದ್ದು, ಇದು ಪ್ರಕೃತಿ ವಿಕೋಪಗಳಿಗೆ ಕಾರಣವಾಗುತ್ತಿದೆ.
➤ ಭಾರತ : 2010-11ರಲ್ಲಿ 6,97,898 ಚದರ ಕಿ.ಮೀ ಇದ್ದ ಅರಣ್ಯ ಪ್ರದೇಶವು, 2021-22ಕ್ಕೆ 7,15,342 ಚದರ ಕಿ.ಮೀಗೆ ಏರಿಕೆಯಾಗಿದೆ.
➤ ಕರ್ನಾಟಕದ ಸಾಧನೆ: ವರದಿಗಳ ಪ್ರಕಾರ, ಕರ್ನಾಟಕದಲ್ಲಿ ಸುಮಾರು 3,122 ಚದರ ಕಿ.ಮೀ ಅರಣ್ಯ ಪ್ರದೇಶ ಹೆಚ್ಚಳವಾಗಿದೆ. ಇದು ಸಸಿ ನೆಡುವಿಕೆ ಮತ್ತು ಅರಣ್ಯ ಸಂರಕ್ಷಣಾ ಕಾರ್ಯಕ್ರಮಗಳ ಯಶಸ್ಸನ್ನು ತೋರಿಸುತ್ತದೆ.