➤ ವಿಶ್ವಸಂಸ್ಥೆ (ನ್ಯೂಯಾರ್ಕ್): ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ (UNSC) 2028-2029ನೇ ಸಾಲಿನ ತಾತ್ಕಾಲಿಕ ಸದಸ್ಯತ್ವಕ್ಕಾಗಿ ನಡೆಯಲಿರುವ ಚುನಾವಣೆಯಲ್ಲಿ ಭಾರತವು ವಿಶ್ವಸಂಸ್ಥೆಯ ಶಾಂತಿಪಾಲನಾ (UN Peacekeeping) ಕಾರ್ಯಾಚರಣೆಗಳಿಗೆ ಅತ್ಯಂತ ಹೆಚ್ಚಿನ ಪ್ರಾಮುಖ್ಯತೆ ಮತ್ತು ಆದ್ಯತೆ ನೀಡಲಿದೆ ಎಂದು ವಿಶ್ವಸಂಸ್ಥೆಯಲ್ಲಿ ಭಾರತದ ಕಾಯಂ ಪ್ರತಿನಿಧಿ ಪರ್ವತನೇನಿ ಹರೀಶ್ ಸ್ಪಷ್ಟಪಡಿಸಿದ್ದಾರೆ.
➤ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ನಡೆದ ಶಾಂತಿಪಾಲನಾ ವಿಷಯದ ಮೇಲಿನ ಮುಕ್ತ ಚರ್ಚೆಯಲ್ಲಿ ಮಾತನಾಡಿದ ಅವರು, ವಿಶ್ವಸಂಸ್ಥೆಯ ಶಾಂತಿಪಾಲನೆಗೆ ಭಾರತ ನೀಡುತ್ತಿರುವ ಕೊಡುಗೆ ಹಾಗೂ ಭವಿಷ್ಯದ ಸುಧಾರಣೆಗಳ ಕುರಿತು ಪ್ರಮುಖ ವಿಷಯಗಳನ್ನು ಪ್ರಸ್ತಾಪಿಸಿದರು.
- ಅತಿ ಹೆಚ್ಚು ಸೈನಿಕರ ನಿಯೋಜನೆ: ವಿಶ್ವಸಂಸ್ಥೆಯ ಶಾಂತಿಪಾಲನಾ ಪಡೆಗೆ (UN Peacekeeping Forces) ಅತಿ ಹೆಚ್ಚು ಸೈನಿಕರನ್ನು ಕಳುಹಿಸಿದ ಹೆಗ್ಗಳಿಕೆ ಭಾರತಕ್ಕಿದೆ. 
- ಮಿಷನ್‌ಗಳ ಸಂಖ್ಯೆ: ಭಾರತವು ಇದುವರೆಗೆ ವಿಶ್ವಸಂಸ್ಥೆಯ 50ಕ್ಕೂ ಹೆಚ್ಚು ಮಿಷನ್‌ಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಿದೆ. 
- ನಿಯೋಜಿತ ಯೋಧರು: ಈವರೆಗಿನ ಕಾರ್ಯಾಚರಣೆಗಳಲ್ಲಿ ಸುಮಾರು 3 ಲಕ್ಷಕ್ಕೂ ಅಧಿಕ ಭಾರತೀಯ ಯೋಧರು ಸೇವೆ ಸಲ್ಲಿಸಿದ್ದಾರೆ.
- ಯೋಧರ ತ್ಯಾಗ: ವಿಶ್ವಸಂಸ್ಥೆಯ ಶಾಂತಿ ಕಾರ್ಯಾಚರಣೆಗಳ ವೇಳೆ ಭಾರತದ 184 ಯೋಧರು ಪ್ರಾಣತ್ಯಾಗ (ವೀರಮರಣ) ಮಾಡಿದ್ದಾರೆ.

➤ ಶಾಂತಿಪಾಲನಾ ಕಾರ್ಯಾಚರಣೆ ಸುಧಾರಣೆಗೆ ಭಾರತದ 8 ಪ್ರಮುಖ ಪ್ರಸ್ತಾಪಗಳು: ಶಾಂತಿಪಾಲನಾ ಕಾರ್ಯಾಚರಣೆಯನ್ನು ಮತ್ತಷ್ಟು ಪರಿಣಾಮಕಾರಿ, ಪಾರದರ್ಶಕ ಹಾಗೂ ಪ್ರಸ್ತುತ ಕಾಲಕ್ಕೆ ತಕ್ಕಂತೆ ಬದಲಾಯಿಸಲು ಪರ್ವತನೇನಿ ಹರೀಶ್ ಅವರು ಪ್ರಮುಖ ಸಲಹೆ ಹಾಗೂ ಪ್ರಸ್ತಾಪಗಳನ್ನು ಮಂಡಿಸಿದರು:
1. ರಾಜಕೀಯ ತೊಡಗಿಸಿಕೊಳ್ಳುವಿಕೆ (Political Engagement): ಪ್ರತಿಯೊಂದು ಶಾಂತಿಪಾಲನಾ ಆದೇಶದೊಂದಿಗೆ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯು ಸುಸ್ಥಿರ ರಾಜಕೀಯ ಸಂವಾದ ಹಾಗೂ ತೊಡಗಿಸಿಕೊಳ್ಳುವಿಕೆಯನ್ನು ಮುಂದುವರಿಸಬೇಕು.
2. ಸಂಯಮ ಮತ್ತು ಸಮ್ಮತಿ (Restraint & Consent): ಶಾಂತಿಪಾಲನೆ ವೇಳೆ ಸೈನಿಕರ ಸಂಯಮ, ನಿಷ್ಪಕ್ಷಪಾತತನ ಮತ್ತು ಆತಿಥೇಯ ದೇಶದ ಸಮ್ಮತಿಗೆ ಮೊದಲ ಆದ್ಯತೆ ಇರಬೇಕು.
3. ಸೈನಿಕರನ್ನು ಕಳುಹಿಸುವ ದೇಶಗಳ ಜೊತೆ ಸಮಾಲೋಚನೆ: ಮಿಷನ್ ಆದೇಶಗಳನ್ನು ರೂಪಿಸುವ ಮುನ್ನ ಸೈನಿಕರನ್ನು ಕಳುಹಿಸುವ (Troop Contributing Countries) ದೇಶಗಳ ಜೊತೆ ವ್ಯಾಪಕ ಚರ್ಚೆ ನಡೆಸಬೇಕು.
4. ಆತಿಥೇಯ ದೇಶದ ಆದ್ಯತೆಗಳಿಗೆ ಬೆಂಬಲ: ಆತಿಥೇಯ ರಾಷ್ಟ್ರಗಳ ಅಗತ್ಯತೆ ಮತ್ತು ಆದ್ಯತೆಗಳಿಗೆ ತಕ್ಕಂತೆ ಮಿಷನ್‌ಗಳು ಕಾರ್ಯನಿರ್ವಹಿಸಬೇಕು.
5. ಸಂಪನ್ಮೂಲಗಳ ಪೋಲು ತಡೆ: ಅನಗತ್ಯ ವೆಚ್ಚ ಮತ್ತು ಸಂಪನ್ಮೂಲಗಳ ಪೋಲನ್ನು ತಡೆಗಟ್ಟಲು ಶಾಂತಿಪಾಲನಾ ಆದೇಶಗಳನ್ನು (Mandates) ಸರಳೀಕರಿಸಬೇಕು.
6. ಮಹಿಳಾ ಶಾಂತಿಪಾಲಕರ ಭಾಗವಹಿಸುವಿಕೆ: ಶಾಂತಿಪಾಲನಾ ಪಡೆಗಳಲ್ಲಿ ಮಹಿಳಾ ಸೈನಿಕರ (Women Peacekeepers) ಸಂಖ್ಯೆ ಹಾಗೂ ಭಾಗವಹಿಸುವಿಕೆಯನ್ನು ಹೆಚ್ಚಿಸಬೇಕು.
7. ನವೀಕರಿಸಬಹುದಾದ ಇಂಧನ ಹಾಗೂ ತಂತ್ರಜ್ಞಾನ: ಕಾರ್ಯಾಚರಣೆಗಳಲ್ಲಿ ಆಧುನಿಕ ತಂತ್ರಜ್ಞಾನ ಮತ್ತು ನವೀಕರಿಸಬಹುದಾದ ಇಂಧನ (Renewable Energy) ಬಳಕೆಯನ್ನು ವೇಗಗೊಳಿಸಬೇಕು.
8. ವಿಶ್ವಸಂಸ್ಥೆ ಭದ್ರತಾ ಮಂಡಳಿ ಪುನರ್ರಚನೆ: ಭದ್ರತಾ ಮಂಡಳಿಯ ನಂಬಿಕೆಯನ್ನು ಉಳಿಸಿಕೊಳ್ಳಲು ಮತ್ತು ಪರಿಣಾಮಕಾರಿ ನಿರ್ಧಾರ ಕೈಗೊಳ್ಳಲು ಜಾಗತಿಕ ಮಟ್ಟದಲ್ಲಿ ವ್ಯಾಪಕ ಸುಧಾರಣೆ ಅಗತ್ಯ.

➤ ಆಂಟೋನಿಯೊ ಗುಟೆರಸ್ (ವಿಶ್ವಸಂಸ್ಥೆ ಮಹಾಪ್ರಾಧಾನ ಕಾರ್ಯದರ್ಶಿ) ಬೆಂಬಲ: ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರಸ್ ಕೂಡ ಭಾರತದ ಈ ಅಭಿಪ್ರಾಯಕ್ಕೆ ಸಹಮತ ವ್ಯಕ್ತಪಡಿಸಿದ್ದು, ಪಡೆಗಳನ್ನು ನಿಯೋಜಿಸುವ ಮುನ್ನ ದೀರ್ಘಕಾಲೀನ ರಾಜಕೀಯ ಪರಿಹಾರ ಹಾಗೂ ಸುಸ್ಥಿರ ಶಾಂತಿಯ ಕಡೆಗೆ ಗಮನ ಹರಿಸುವುದು ಮುಖ್ಯ ಎಂದು ತಿಳಿಸಿದ್ದಾರೆ