ವಿಶ್ವ ಅರೋಗ್ಯ ಸಂಸ್ಥೆಯ ಕಾರ್ಯಕಾರಿ ಮಂಡಳಿ ಅಧ್ಯಕ್ಷರಾಗಿ ಕೇಂದ್ರ ಸಚಿವ ಡಾ. ಹರ್ಷವರ್ಧನ್ ಆಯ್ಕೆ

ನವದೆಹಲಿ : ಭಾರತ ಸರ್ಕಾರದ ಕೇಂದ್ರ ಆರೋಗ್ಯ ಸಚಿವ ಡಾ. ಹರ್ಷ್ ವರ್ಧನ್ ಅವರು ವಿಶ್ವ ಆರೋಗ್ಯ ಸಂಸ್ಥೆಯ ಕಾರ್ಯಕಾರಿ ಮಂಡಳಿ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಲಿದ್ದಾರೆ. ಪ್ರಸ್ತುತ ಹುದ್ದೆ ನಿರ್ವಹಿಸುತ್ತಿರುವ ಜಪಾನ್​ನ ಡಾ.ಹಿರೋಕಿ ನಕಾಟಾನಿ ಅವರ ಸ್ಥಾನದಲ್ಲಿ ಹರ್ಷ್ ವರ್ಧನ್ ಮುಂದುವರೆಯಲಿದ್ದಾರೆ. ಒಟ್ಟು 34 ಸದಸ್ಯರಿರುವ ವಿಶ್ವ ಅರೋಗ್ಯ ಸಂಸ್ಥೆಯ (WHO) ಕಾರ್ಯಕಾರಿ ಮಂಡಳಿಯ ಅಧ್ಯಕ್ಷರಾಗಿ ಹರ್ಷ್ ವರ್ಧನ್ ಅವರು ಇದೆ ಮೇ 22, ರ ಶುಕ್ರವಾರದಂದು ಅಧಿಕಾರ ಸ್ವೀಕರಿಸುವ ಸಾಧ್ಯತೆ ಇದೆ. * ಮೇ 19 ರಂದು ನಡೆದ 194 ಸದಸ್ಯ ಬಲದ ವಿಶ್ವ ಆರೋಗ್ಯ ಅಧಿವೇಶನದಲ್ಲಿ ಭಾರತಕ್ಕೆ ಎಕ್ಸಿಕ್ಯೂಟಿವ್ ಬೋರ್ಡ್ ಛೇರ್ಮನ್ ಸ್ಥಾನ ನೀಡಲು ಅಂಕಿತ ಹಾಕಲಾಯಿತು. * 3 ವರ್ಷದ ಅವಧಿಗೆ ಈ ನೇಮಕಾತಿ ನಡೆದಿದ್ದು, ಮೊದಲ ವರ್ಷ ಡಾ. ಹರ್ಷ್ ವರ್ಧನ್ ಅವರು ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸುವರು. ಉಳಿದ 2 ವರ್ಷ ಬೇರೆ ದೇಶದ ಪ್ರತಿನಿಧಿಗಳು ಆ ಸ್ಥಾನ ಮುಂದುವರೆಸಿದ್ದಾರೆ.