➤ ಮಳೆಗಾಲದ ಪೂರೈಕೆ ಅಡಚಣೆಗಳು ಮತ್ತು ತೀವ್ರ ಶಾಖದ ಅಲೆಯಿಂದಾಗಿ ದೇಶಾದ್ಯಂತ 45 ಉಷ್ಣ ವಿದ್ಯುತ್ ಸ್ಥಾವರಗಳಲ್ಲಿ (Thermal Power Plants) ಕಲ್ಲಿದ್ದಲು ಸಂಗ್ರಹವು ಗಂಭೀರ ಮಟ್ಟಕ್ಕೆ (Critical Coal Stocks) ಕುಸಿದಿದೆ. ಕೇಂದ್ರ ವಿದ್ಯುತ್ ಪ್ರಾಧಿಕಾರದ (CEA) ವರದಿಯ ಪ್ರಕಾರ, ಈ ಸ್ಥಾವರಗಳಲ್ಲಿ ನಿಯಮಾನುಸಾರ ಇರಬೇಕಾದ ಕಲ್ಲಿದ್ದಲು ಸಂಗ್ರಹಕ್ಕಿಂತ ಶೇ. 25 ಕ್ಕಿಂತ ಕಡಿಮೆ ಅಥವಾ 3 ದಿನಗಳಿಗಿಂತ ಕಡಿಮೆ ಅವಧಿಗೆ ಮಾತ್ರ ಸಾಕಾಗುವಷ್ಟು ಇಂಧನ ಲಭ್ಯವಿದೆ.
➤ ಕಲ್ಲಿದ್ದಲು ಅಭಾವಕ್ಕೆ ಪ್ರಮುಖ ಕಾರಣಗಳು:

1. ಮಳೆಗಾಲದ ಅಡಚಣೆ (Monsoon Disruption): ಒಡಿಶಾ, ಜಾರ್ಖಂಡ್ ಮತ್ತು ಛತ್ತೀಸ್‌ಗಢದಂತಹ ಪ್ರಮುಖ ಕಲ್ಲಿದ್ದಲು ಗಣಿ ಪ್ರದೇಶಗಳಲ್ಲಿ ಭಾರಿ ಮಳೆಯಿಂದಾಗಿ ಗಣಿಗಾರಿಕೆ ಮತ್ತು ಸಾಗಣೆ ಮಂದಗತಿಯಲ್ಲಿದೆ.
2. ರೈಲ್ವೆ ರೇಕ್‌ಗಳ (Railway Rakes) ಕೊರತೆ: ದಿನನಿತ್ಯ ಬೇಕಾಗುವ 5 ರಿಂದ 6 ರೈಲ್ವೆ ರೇಕ್ ಕಲ್ಲಿದ್ದಲು ಪೂರೈಕೆಯಲ್ಲಿ ಸ್ಥಾವರಗಳಿಗೆ ಅರ್ಧದಷ್ಟು ಮಾತ್ರ ಲಭ್ಯವಾಗುತ್ತಿದೆ.
3. ಹೆಚ್ಚಿದ ವಿದ್ಯುತ್ ಬೇಡಿಕೆ: ತಾಪಮಾನ ಏರಿಕೆಯ ಪರಿಣಾಮವಾಗಿ ದೇಶದಲ್ಲಿ ಹವಾನಿಯಂತ್ರಣ (AC) ಮತ್ತು ವಿದ್ಯುತ್ ಉಪಕರಣಗಳ ಬಳಕೆ ಹೆಚ್ಚಾಗಿದ್ದು, ರಾತ್ರಿ ವೇಳೆಯ ವಿದ್ಯುತ್ ಬಳಕೆ ಏರಿಕೆಯಾಗಿದೆ.
4. ಒಟ್ಟು ಸಂಗ್ರಹದಲ್ಲಾದ ಕುಸಿತ: ಬಿಗ್‌ಮಿಂಟ್ (BigMint) ವರದಿಯ ಪ್ರಕಾರ, ಉಷ್ಣ ವಿದ್ಯುತ್ ಸ್ಥಾವರಗಳಲ್ಲಿನ ಒಟ್ಟು ಕಲ್ಲಿದ್ದಲು ದಾಸ್ತಾನು ಜುಲೈ ಅಂತ್ಯಕ್ಕೆ ಹೋಲಿಸಿದರೆ ಶೇ. 19 ರಷ್ಟು ಕುಸಿದು 30.95 ಮಿಲಿಯನ್ ಟನ್‌ಗಳಿಗೆ ತಲುಪಿದೆ.