➤ ಭಾರತದ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಮತ್ತೊಂದು ಮಹತ್ವದ ಸಾಧನೆ ದಾಖಲೆಯಾಗಿದೆ. ಮುಂಬೈನ ಭಾರತೀಯ ತಾಂತ್ರಿಕ ಸಂಸ್ಥೆ (ಐಐಟಿ ಬಾಂಬೆ) ಯಲ್ಲಿ ದೇಶದ 38ನೇ ಸೂಪರ್ ಕಂಪ್ಯೂಟರ್ ‘ಪರಮ್ ರುದ್ರ’ ಅನ್ನು ಅಧಿಕೃತವಾಗಿ ಕಾರ್ಯಾರಂಭಗೊಳಿಸಲಾಗಿದೆ. ಇದು ಕೇವಲ ಐಐಟಿ ಬಾಂಬೆಯ ಸಂಶೋಧಕರಿಗಷ್ಟೇ ಸೀಮಿತವಾಗದೆ, ದೇಶದಾದ್ಯಂತದ ವೈಜ್ಞಾನಿಕ ಸಮುದಾಯಕ್ಕೆ ಮಹತ್ವದ ಬೆಂಬಲ ಒದಗಿಸಲಿದೆ.
➤ ‘ಪರಮ್ ರುದ್ರ’ ಸೂಪರ್ ಕಂಪ್ಯೂಟರ್ ಅನ್ನು ರಾಷ್ಟ್ರೀಯ ಸೂಪರ್ ಕಂಪ್ಯೂಟಿಂಗ್ ಮಿಷನ್ (NSM) ಅಡಿಯಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ಈ ಮಿಷನ್ ಅನ್ನು ವಿದ್ಯುನ್ಮಾನ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ (MeitY) ಹಾಗೂ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ (DST) ಜಂಟಿಯಾಗಿ ಅನುಷ್ಠಾನಗೊಳಿಸುತ್ತಿವೆ. ಈ ಯೋಜನೆಯನ್ನು ಸಿಡಾಕ್ (C-DAC), ಪುಣೆ ಮತ್ತು ಭಾರತೀಯ ವಿಜ್ಞಾನ ಸಂಸ್ಥೆ (IISc), ಬೆಂಗಳೂರು ಜಾರಿಗೆ ತರುತ್ತಿವೆ.
➤ ‘ಪರಮ್ ರುದ್ರ’ ಸೂಪರ್ ಕಂಪ್ಯೂಟರ್ 3 ಪೆಟಾಫ್ಲಾಪ್ಸ್ ಕಾರ್ಯಕ್ಷಮತೆಯುಳ್ಳ ಅತ್ಯಾಧುನಿಕ ಹೈ–ಪರ್ಫಾರ್ಮೆನ್ಸ್ ಕಂಪ್ಯೂಟಿಂಗ್ (HPC) ವ್ಯವಸ್ಥೆಯಾಗಿದೆ. ಇದನ್ನು ಸಂಪೂರ್ಣವಾಗಿ ಸ್ವದೇಶಿ ತಂತ್ರಜ್ಞಾನದಲ್ಲಿ ಅಭಿವೃದ್ಧಿಪಡಿಸಲಾಗಿದ್ದು, ಸಿಡಾಕ್ (C-DAC), ಪುಣೆ ಇದರ ವಿನ್ಯಾಸ ಮತ್ತು ನಿರ್ಮಾಣಕ್ಕೆ ಪ್ರಮುಖ ಪಾತ್ರವಹಿಸಿದೆ. ಈ ವ್ಯವಸ್ಥೆಯ ವಿಶೇಷತೆಯೆಂದರೆ, ಅತ್ಯಾಧುನಿಕ Direct Contact Liquid Cooling ತಂತ್ರಜ್ಞಾನವನ್ನು ಅಳವಡಿಸಿರುವುದು. ಹೆಚ್ಚಿನ ವೇಗದಲ್ಲಿ ಗಣನೆ ನಡೆಯುವ ಸಂದರ್ಭದಲ್ಲಿ ಉಂಟಾಗುವ ಅತಿಯಾದ ಉಷ್ಣತೆಯನ್ನು ಈ ಲಿಕ್ವಿಡ್ ಕೂಲಿಂಗ್ ವ್ಯವಸ್ಥೆ ಪರಿಣಾಮಕಾರಿಯಾಗಿ ನಿಯಂತ್ರಿಸಿ, ಯಂತ್ರದ ಸ್ಥಿರ ಕಾರ್ಯಕ್ಷಮತೆಯನ್ನು ಕಾಪಾಡುತ್ತದೆ. ಇದರ ಫಲವಾಗಿ ಶಕ್ತಿ ಬಳಕೆ ಕಡಿಮೆಯಾಗುವುದರೊಂದಿಗೆ, ಗಣನೆಯ ವೇಗ, ದಕ್ಷತೆ ಮತ್ತು ವಿಶ್ವಾಸಾರ್ಹತೆ ಮತ್ತಷ್ಟು ಹೆಚ್ಚಾಗುತ್ತದೆ.
➤ ‘ಪರಮ್ ರುದ್ರ’ ಸೂಪರ್ ಕಂಪ್ಯೂಟರ್ ವಿವಿಧ ಉನ್ನತ ಸಂಶೋಧನಾ ಕ್ಷೇತ್ರಗಳಲ್ಲಿ ಕ್ರಾಂತಿಕಾರಿ ಬದಲಾವಣೆ ತರಲಿದೆ:
=> ಕೃತಕ ಬುದ್ಧಿಮತ್ತೆ (AI) ಮತ್ತು ಡೇಟಾ ಅನಾಲಿಟಿಕ್ಸ್
=> ಬಯೋಟೆಕ್ನಾಲಜಿ ಮತ್ತು ವೈದ್ಯಕೀಯ ಸಂಶೋಧನೆ
=> ಹವಾಮಾನ ಮುನ್ಸೂಚನೆ ಮತ್ತು ಚಂಡಮಾರುತ ಅಧ್ಯಯನ
=> ಮುಂದುವರಿದ ಉತ್ಪಾದನಾ ತಂತ್ರಜ್ಞಾನ
=> ಅಂತರಿಕ್ಷ ಮತ್ತು ಖಗೋಳ ಸಂಶೋಧನೆ
 ಐಐಟಿ ಬಾಂಬೆಯ ಸುಮಾರು 200ಕ್ಕೂ ಹೆಚ್ಚು ಅಧ್ಯಾಪಕರು ಮತ್ತು 1,200ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ತಮ್ಮ ಸಂಕೀರ್ಣ ಸಂಶೋಧನೆಗಳಿಗೆ ಈ ಸೌಲಭ್ಯವನ್ನು ಬಳಸಿಕೊಳ್ಳಲಿದ್ದಾರೆ. ಜೊತೆಗೆ ಸ್ಟಾರ್ಟ್‌ಅಪ್‌ಗಳು, MSMEಗಳು ಮತ್ತು ಕೈಗಾರಿಕಾ ಸಂಶೋಧನೆಗಳಿಗೂ ಇದು ಮಹತ್ವದ ಸಹಾಯವಾಗಲಿದೆ.
➤ ಪ್ರಮುಖ ಸಂಶೋಧನಾ ಉಪಯೋಗಗಳು:-
=> ಬಾಹ್ಯಾಕಾಶ ಸಂಶೋಧನೆ: ಜೈಂಟ್ ಮೀಟರ್ ವೇವ್ ರೇಡಿಯೋ ಟೆಲಿಸ್ಕೋಪ್ (GMRT) ದತ್ತಾಂಶಗಳ ವೇಗದ ಸಂಸ್ಕರಣೆ
=> ಹವಾಮಾನ ಅಧ್ಯಯನ: ಚಂಡಮಾರುತ, ಭಾರೀ ಮಳೆ, ಉಷ್ಣ ಅಲೆಗಳ ನಿಖರ ಮುನ್ಸೂಚನೆ
=> ವೈದ್ಯಕೀಯ ಕ್ಷೇತ್ರ: ಹೊಸ ಔಷಧಗಳ ಪತ್ತೆ, ಕ್ಯಾನ್ಸರ್ ಮುಂತಾದ ಕಾಯಿಲೆಗಳ ಜೀನ್ ಮ್ಯಾಪಿಂಗ್
➤ ಪರಮ್ ರುದ್ರ: ಒಟ್ಟು ₹130 ಕೋಟಿ ವೆಚ್ಚದಲ್ಲಿ ಮೂರು ‘ಪರಮ್ ರುದ್ರ’ ಸೂಪರ್ ಕಂಪ್ಯೂಟರ್‌ಗಳನ್ನು ಅಭಿವೃದ್ಧಿಪಡಿಸಲಾಗಿದೆ. ಅವುಗಳನ್ನು ಕೆಳಕಂಡ ಸ್ಥಳಗಳಲ್ಲಿ ಸ್ಥಾಪಿಸಲಾಗಿದೆ:
- ದೆಹಲಿ: Inter University Accelerator Centre (IUAC)
- ಪುಣೆ: Giant Metre Radio Telescope (GMRT)
- ಕೊಲ್ಕತ್ತಾ: S N Bose National Centre for Basic Sciences
➤ ‘ಪರಮ್ ರುದ್ರ’ ಸೇರ್ಪಡೆಯೊಂದಿಗೆ, ಭಾರತದಲ್ಲಿ ಒಟ್ಟು 38 ಸೂಪರ್ ಕಂಪ್ಯೂಟರ್‌ಗಳು ಸ್ಥಾಪನೆಯಾಗಿದ್ದು, ಅವುಗಳ ಒಟ್ಟು ಗಣನಾ ಸಾಮರ್ಥ್ಯ 44 ಪೆಟಾಫ್ಲಾಪ್ಸ್ ಗೆ ಏರಿಕೆಯಾಗಿದೆ. ಇದು ಭಾರತವನ್ನು ಜಾಗತಿಕ ಸೂಪರ್ ಕಂಪ್ಯೂಟಿಂಗ್ ಶಕ್ತಿಗಳ ಸಾಲಿಗೆ ಮತ್ತಷ್ಟು ಹತ್ತಿರ ತರುತ್ತಿದೆ.
➤ ‘ಪರಮ್ ರುದ್ರ’ ಸೂಪರ್ ಕಂಪ್ಯೂಟರ್ ಭಾರತದ ಆತ್ಮನಿರ್ಭರ ಭಾರತ ದೃಷ್ಟಿಕೋನಕ್ಕೆ ಬಲ ನೀಡುವ ಮಹತ್ವದ ಹೆಜ್ಜೆಯಾಗಿದೆ. ವಿಜ್ಞಾನ, ತಂತ್ರಜ್ಞಾನ, ಹವಾಮಾನ, ಆರೋಗ್ಯ ಮತ್ತು ಅಂತರಿಕ್ಷ ಸಂಶೋಧನೆಗಳಲ್ಲಿ ಜಾಗತಿಕ ಮಟ್ಟದ ಸಾಧನೆಗಳನ್ನು ಸಾಧ್ಯವಾಗಿಸುವ ಸಾಮರ್ಥ್ಯ ಇದಕ್ಕೆ ಇದೆ.