➤ ವೈದ್ಯಕೀಯ ಕ್ಷೇತ್ರದಲ್ಲಿ ಹೆಚ್ಚಾಗುತ್ತಿರುವ ನಕಲಿ ಪ್ರಚಾರ, ಸುಳ್ಳು ಭರವಸೆಗಳು ಹಾಗೂ ತಂತ್ರಜ್ಞಾನದ ದುರುಪಯೋಗಕ್ಕೆ ಅಣೆಕಟ್ಟು ಹಾಕಲು ರಾಷ್ಟ್ರೀಯ ವೈದ್ಯಕೀಯ ಆಯೋಗ (National Medical Commission - NMC) ಮಹತ್ವದ ಹೆಜ್ಜೆ ಇಟ್ಟಿದೆ. ವೈದ್ಯಕೀಯ ಸೇವೆಗಳು, ಆಸ್ಪತ್ರೆಗಳು ಮತ್ತು ವೈದ್ಯರ ಜಾಹೀರಾತುಗಳಲ್ಲಿ ಕೃತಕ ಬುದ್ಧಿಮತ್ತೆ (Artificial Intelligence - AI) ಬಳಸಿ ನಕಲಿ ರೋಗಿಗಳ ಅಭಿಪ್ರಾಯ (Reviews), ಅನುಮೋದನೆಗಳು ಹಾಗೂ ಸುಳ್ಳು ಚಿಕಿತ್ಸಾ ಫಲಿತಾಂಶಗಳನ್ನು ಸೃಷ್ಟಿಸುವುದನ್ನು NMC ಕಟ್ಟುನಿಟ್ಟಾಗಿ ನಿಷೇಧಿಸಿದೆ.
➤ ಕೇಂದ್ರ ಸರ್ಕಾರದ ಈ ನೂತನ ಕಾಯ್ದೆ ಹಾಗೂ ಮಾರ್ಗಸೂಚಿಗಳು ತಕ್ಷಣದಿಂದಲೇ ಜಾರಿಗೆ ಬಂದಿದ್ದು, ವೈದ್ಯಕೀಯ ವೃತ್ತಿಯ ಘನತೆಯನ್ನು ಎತ್ತಿಹಿಡಿಯಲು ಮತ್ತು ಸಾರ್ವಜನಿಕರ ಆರೋಗ್ಯ ಸುರಕ್ಷತೆಯನ್ನು ಕಾಪಾಡಲು ಈ ಕ್ರಮ ಕೈಗೊಳ್ಳಲಾಗಿದೆ.
➤ ಪ್ರಮುಖ ನಿಷೇಧಗಳು ಹಾಗೂ ನಿಯಮಗಳು

1. AI ಪ್ರಚಾರ ಮತ್ತು ನಕಲಿ ರಿವ್ಯೂಗಳ ಬಳಕೆ ಬಂದ್: ಸಾಮಾಜಿಕ ಜಾಲತಾಣಗಳು ಹಾಗೂ ವೆಬ್‌ಸೈಟ್‌ಗಳಲ್ಲಿ AI ತಂತ್ರಜ್ಞಾನ ಬಳಸಿ ಕೃತಕವಾಗಿ ರೋಗಿಗಳ ಚಿತ್ರ, ಧ್ವನಿ, ಅಥವಾ ಚಿಕಿತ್ಸೆಯ ಫಲಿತಾಂಶಗಳ (Before & After Photo) ಪ್ರದರ್ಶನವನ್ನು ಸಂಪೂರ್ಣವಾಗಿ ತಡೆಯಲಾಗಿದೆ. ಅಲ್ಲದೆ, ಆನ್‌ಲೈನ್‌ನಲ್ಲಿ ನಕಲಿ ಲೈಕ್ಸ್, ಸಬ್‌ಸ್ಕ್ರೈಬರ್ಸ್, ಗೂಗಲ್ ರಿವ್ಯೂಗಳನ್ನು ಹಣ ಕೊಟ್ಟು ಪಡೆದುಕೊಳ್ಳುವುದು ಮತ್ತು ಸರ್ಚ್ ರ‍್ಯಾಂಕಿಂಗ್ ಬದಲಾಯಿಸುವುದನ್ನೂ ನಿಷೇಧಿಸಲಾಗಿದೆ.

2. ಅತಿಶಯೋಕ್ತಿಯ ಪದಬಳಕೆಗೆ ತಡೆ
ವೈದ್ಯರು ಅಥವಾ ಆಸ್ಪತ್ರೆಗಳು ತಮ್ಮ ಪ್ರಚಾರಕ್ಕಾಗಿ:
  • 'ದೇಶದ ನಂ. 1 ವೈದ್ಯ' (No. 1 Doctor)
  • 'ಅತ್ಯುತ್ತಮ ಚಿಕಿತ್ಸೆ' (Best Specialist)
  • '100% ಗುಣಮುಖದ ಖಾತರಿ' (100% Guaranteed Cure)
  • 'ನೋವಿಲ್ಲದ ಚಿಕಿತ್ಸೆ' (Painless Treatment)
ಎಂಬಂತಹ ಆಧಾರರಹಿತ ಮತ್ತು ಪರಿಶೀಲಿಸಲಾಗದ ಪದಗಳನ್ನು ಬಳಸುವಂತಿಲ್ಲ.
3. ರಿಯಾಯಿತಿ ಕೂಪನ್ ಹಾಗೂ ಪ್ರಭಾವಿಗಳ (Influencers) ಪ್ರಚಾರ ನಿಷೇಧ: ಆಸ್ಪತ್ರೆಗೆ ರೋಗಿಗಳನ್ನು ಸೆಳೆಯಲು ರಿಯಾಯಿತಿ ಕೂಪನ್‌ಗಳು, ಕ್ಯಾಶ್‌ಬ್ಯಾಕ್ ಆಫರ್‌ಗಳು, ಗಿಫ್ಟ್‌ಗಳು ಹಾಗೂ ಕಮಿಷನ್ ಆಧಾರಿತ ಪ್ರಚಾರಗಳನ್ನು ಕಟ್ಟುನಿಟ್ಟಾಗಿ ತಡೆಯಲಾಗಿದೆ. ಇದರ ಜೊತೆಗೆ, ಸೆಲೆಬ್ರಿಟಿಗಳು ಅಥವಾ ಪ್ರಭಾವಿ ವ್ಯಕ್ತಿಗಳಿಂದ (Social Media Influencers) ಆಸ್ಪತ್ರೆ ಅಥವಾ ವೈದ್ಯರ ಪ್ರಚಾರ ಮಾಡಿಸುವುದಕ್ಕೂ ತಡೆ ನೀಡಲಾಗಿದೆ.
➤ ನಿಯಮ ಉಲ್ಲಂಘಿಸಿದರೆ ಕಠಿಣ ಶಿಸ್ತುಕ್ರಮ: ಹೊಸ ನಿಯಮಗಳನ್ನು ಉಲ್ಲಂಘಿಸುವ ವೈದ್ಯರು ಹಾಗೂ ಆಸ್ಪತ್ರೆಗಳ ವಿರುದ್ಧ ಹಂತ-ಹಂತವಾಗಿ ಕಠಿಣ ಶಿಸ್ತುಕ್ರಮ ಕೈಗೊಳ್ಳಲಾಗುತ್ತದೆ:
ಉಲ್ಲಂಘನೆಯ ಹಂತ ವಿಧಿಸುವ ಶಿಸ್ತುಕ್ರಮ
ಮೊದಲ ಉಲ್ಲಂಘನೆ ಔಪಚಾರಿಕ ಎಚ್ಚರಿಕೆ ಹಾಗೂ ಕಡ್ಡಾಯ ನೀತಿ ತರಬೇತಿ (Ethics Training)
ಎರಡನೇ ಉಲ್ಲಂಘನೆ ಖಂಡನಾ ಪತ್ರ ಮತ್ತು ದಂಡ ವಿಧಿಸುವಿಕೆ
ಮೂರನೇ ಉಲ್ಲಂಘನೆ 3ರಿಂದ 6 ತಿಂಗಳವರೆಗೆ ವೈದ್ಯಕೀಯ ಪರವಾನಗಿ (Medical License) ಅಮಾನತು
ಗಂಭೀರ/ಪ್ರಮುಖ ಉಲ್ಲಂಘನೆ 6ರಿಂದ 12 ತಿಂಗಳವರೆಗೆ ವೈದ್ಯಕೀಯ ಪರವಾನಗಿ ಅಮಾನತು
ಮರುಕಳಿಸುವ ಉಲ್ಲಂಘನೆ ವೈದ್ಯಕೀಯ ನೋಂದಣಿಯಿಂದ 1ರಿಂದ 3 ವರ್ಷಗಳ ಕಾಲ ಹೆಸರು ತೆಗೆದುಹಾಕುವುದು (Permanent Ban/Removal)

➤ ವೈದ್ಯರು ಹಾಗೂ ಆಸ್ಪತ್ರೆಗಳಿಗೆ ಅವಕಾಶವಿರುವ ವಿಷಯಗಳು: NMC ಈ ಕಟ್ಟುನಿಟ್ಟಿನ ನಿಯಮಗಳನ್ನು ತಂದಿದ್ದರೂ, ಸಾರ್ವಜನಿಕ ಜಾಗೃತಿಗಾಗಿ ಕೆಲವು ಶೈಕ್ಷಣಿಕ ಮಾಹಿತಿ ಹಂಚಿಕೆಗೆ ಅವಕಾಶ ಕಲ್ಪಿಸಿದೆ:   
1. ಆರೋಗ್ಯ ಜಾಗೃತಿ (Health Education): ರೋಗ ತಡೆಗಟ್ಟುವಿಕೆ, ನೈರ್ಮಲ್ಯ ಹಾಗೂ ಆರೋಗ್ಯಕರ ಜೀವನಶೈಲಿಯ ಕುರಿತು ಸತ್ಯಸಂಧ ಹಾಗೂ ನಿಖರವಾದ ಶೈಕ್ಷಣಿಕ ಮಾಹಿತಿಯನ್ನು ಹಂಚಿಕೊಳ್ಳಬಹುದು.   
2. ವೃತ್ತಿಪರ ಸೂಚನೆಗಳು: ಹೊಸ ಕ್ಲಿನಿಕ್ ಪ್ರಾರಂಭ, ವಿಳಾಸ ಬದಲಾವಣೆ ಅಥವಾ ಕ್ಲಿನಿಕ್ ಕೆಲಸದ ಸಮಯದ ಮಾಹಿತಿಯನ್ನು ಸಾರ್ವಜನಿಕವಾಗಿ ಪ್ರಕಟಿಸಬಹುದು.   
3. ಆಸ್ಪತ್ರೆಯ ಮೂಲಸೌಕರ್ಯ (Infrastructure): ಆಸ್ಪತ್ರೆಯಲ್ಲಿ ಲಭ್ಯವಿರುವ ನೈಜ ಮೂಲಸೌಕರ್ಯ ಮತ್ತು ಉಪಕರಣಗಳ ಮಾಹಿತಿಯನ್ನು ಅಧಿಕೃತ ಹೊರ್ಡಿಂಗ್ಸ್‌ಗಳ ಮೂಲಕ ನೀಡಬಹುದು.