* ಜಾಗತಿಕ ರಾಜತಾಂತ್ರಿಕ ಇತಿಹಾಸದಲ್ಲಿ ಒಂದು ಅಪರೂಪದ ವಿದ್ಯಮಾನಕ್ಕೆ ಡಿಸೆಂಬರ್ 26, 2025 ರಂದು ಸಾಕ್ಷಿಯಾಗಿದೆ. ಆಫ್ರಿಕಾದ ಹಾರ್ನ್ ಆಫ್ ಆಫ್ರಿಕಾ (Horn of Africa) ಪ್ರದೇಶದಲ್ಲಿರುವ ಮತ್ತು ದಶಕಗಳಿಂದ ಮಾನ್ಯತೆಗಾಗಿ ಕಾಯುತ್ತಿದ್ದ ಸೊಮಾಲಿಲ್ಯಾಂಡ್ (Somaliland) ಅನ್ನು ಇಸ್ರೇಲ್ ಅಧಿಕೃತವಾಗಿ ಸ್ವತಂತ್ರ ಮತ್ತು ಸಾರ್ವಭೌಮ ರಾಜ್ಯವೆಂದು ಗುರುತಿಸಿದೆ. ಈ ಮೂಲಕ ಇಸ್ರೇಲ್, ಸೊಮಾಲಿಲ್ಯಾಂಡ್‌ಗೆ ಮಾನ್ಯತೆ ನೀಡಿದ ವಿಶ್ವದ ಮೊದಲ ವಿಶ್ವಸಂಸ್ಥೆ (UN) ಸದಸ್ಯ ದೇಶ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
* ಈ ಐತಿಹಾಸಿಕ ಒಪ್ಪಂದದ ಮುಖ್ಯಾಂಶಗಳು ಬಹಳ ಮಹತ್ವದ್ದಾಗಿವೆ. ಇಸ್ರೇಲ್ ಪ್ರಧಾನಮಂತ್ರಿ ಬೆಂಜಮಿನ್ ನೆತನ್ಯಾಹು ಮತ್ತು ವಿದೇಶಾಂಗ ಸಚಿವ ಗಿಡಿಯಾನ್ ಸಾರ್, ಸೊಮಾಲಿಲ್ಯಾಂಡ್ ಅಧ್ಯಕ್ಷ ಅಬ್ದಿರಹ್ಮಾನ್ ಮೊಹಮದ್ ಅಬ್ದುಲ್ಲಾಹಿ (ಅಬ್ದಿರಹ್ಮಾನ್ ಸಿರೋ) ಅವರೊಂದಿಗೆ ವಿಡಿಯೋ ಕಾನ್ಫರೆನ್ಸ್ ಮೂಲಕ ಪರಸ್ಪರ ಮಾನ್ಯತೆಯ ಸಂಯುಕ್ತ ಘೋಷಣೆಗೆ ಸಹಿ ಹಾಕಿದ್ದಾರೆ. ನೆತನ್ಯಾಹು ಅವರ ಪ್ರಕಾರ, ಈ ಘೋಷಣೆ 2020ರಲ್ಲಿ ಅಮೇರಿಕಾ ಮಧ್ಯಸ್ಥಿಕೆಯಲ್ಲಿ ರೂಪುಗೊಂಡ ‘ಅಬ್ರಹಂ ಅಕಾರ್ಡ್ಸ್ (Abraham Accords)’ಗಳ ತತ್ವ ಮತ್ತು ಆಶಯಗಳ ಚೌಕಟ್ಟಿನೊಳಗೆ ಬರುತ್ತದೆ. ಇದರೊಂದಿಗೆ, ಉಭಯ ದೇಶಗಳು ಪೂರ್ಣ ಪ್ರಮಾಣದ ರಾಜತಾಂತ್ರಿಕ ಸಂಬಂಧಗಳನ್ನು ಸ್ಥಾಪಿಸಲು, ರಾಯಭಾರಿಗಳನ್ನು ನೇಮಿಸಲು ಮತ್ತು ದೂತಾವಾಸಗಳನ್ನು ತೆರೆಯಲು ನಿರ್ಧರಿಸಿವೆ, ಇದು ಅಂತರರಾಷ್ಟ್ರೀಯ ರಾಜತಾಂತ್ರಿಕತೆಯಲ್ಲಿ ಪ್ರಮುಖ ಬೆಳವಣಿಗೆಯಾಗಿದೆ.
ಸೊಮಾಲಿಲ್ಯಾಂಡ್ ಹಿನ್ನೆಲೆ ಮತ್ತು ಮಹತ್ವ: ಟಿಷ್ ಸಂರಕ್ಷಿತ ಪ್ರದೇಶವಾಗಿದ್ದ ಸೊಮಾಲಿಲ್ಯಾಂಡ್ 1991ರಲ್ಲಿ ಸೊಮಾಲಿಯಾದಿಂದ ಬೇರ್ಪಟ್ಟು ಸ್ವತಂತ್ರವೆಂದು ಘೋಷಿಸಿಕೊಂಡಿದ್ದು, ಸ್ವಂತ ಕರೆನ್ಸಿ, ಪಾಸ್‌ಪೋರ್ಟ್ ಮತ್ತು ಪೊಲೀಸ್ ಪಡೆ ಹೊಂದಿದ್ದರೂ ಇದುವರೆಗೆ ಯಾವುದೇ ದೇಶದಿಂದ ಅಧಿಕೃತ ಮಾನ್ಯತೆ ಪಡೆಯಲಿಲ್ಲ. ಇತ್ತೀಚಿನ ಬೆಳವಣಿಗೆಯ ಕುರಿತು, ಇಸ್ರೇಲ್ ತನ್ನ ಆಯಕಟ್ಟಿನ ಹಿತಾಸಕ್ತಿಗಳಿಗಾಗಿ ಈ ಕ್ರಮ ಕೈಗೊಂಡಿದೆ ಎನ್ನಲಾಗುತ್ತಿದೆ, ಏಕೆಂದರೆ ಗಲ್ಫ್ ಆಫ್ ಅಡೆನ್‌ನಲ್ಲಿರುವ ಸೊಮಾಲಿಲ್ಯಾಂಡ್‌ನ ಆಯಕಟ್ಟಿನ ಸ್ಥಾನವು, ಏಮನ್‌ನ ಹೌತಿ ಬಂಡುಕೋರರ ಮೇಲೆ ದಾಳಿ ನಡೆಸಲು ಮತ್ತು ಕೆಂಪು ಸಮುದ್ರದಲ್ಲಿ ಇಸ್ರೇಲ್‌ನ ಪ್ರಭಾವವನ್ನು ವಿಸ್ತರಿಸಲು ಮಹತ್ವದ ನೆರವು ನೀಡಲಿದೆ.