➤ ವಿಶ್ವ ಚೆಸ್ ಆಡಳಿತ ಮಂಡಳಿಯಾದ ‘ಫಿಡೆ’ (FIDE - International Chess Federation) ಗೆ ನಡೆದ ಮಹತ್ವದ ಚುನಾವಣೆಯಲ್ಲಿ ಕಜಕಿಸ್ತಾನದ ಖ್ಯಾತ ಉದ್ಯಮಿ ತಿಮೋರ್ ತರ್ಲೊವ್ (Timur Turlov) 8ನೇ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ಭಾರತದ ದಂತಕಥೆ ಹಾಗೂ 5 ಬಾರಿಯ ವಿಶ್ವ ಚಾಂಪಿಯನ್ ವಿಶ್ವನಾಥನ್ ಆನಂದ್ (Viswanathan Anand) ಅವರು ಫಿಡೆಯ ಡೆಪ್ಯೂಟಿ ಪ್ರಸಿಡೆಂಟ್ (ಉಪಾಧ್ಯಕ್ಷ) ಆಗಿ ನೇಮಕಗೊಂಡಿದ್ದಾರೆ. ಉಜ್ಬೇಕಿಸ್ತಾನದ ಸಮರ್‌ಖಂಡ್‌ನಲ್ಲಿ 46ನೇ ಚೆಸ್ ಒಲಿಂಪಿಯಾಡ್ ವೇಳೆ ನಡೆದ ಫಿಡೆ ಸಾಮಾನ್ಯ ಸಭೆ (FIDE General Assembly) ಯಲ್ಲಿ ಈ ಚುನಾವಣೆ ನಡೆಯಿತು.
➤ ಚುನಾವಣೆಯ ಪ್ರಮುಖ ಅಂಶಗಳು ಹಾಗೂ ಮತ ಎಣಿಕೆ ವಿವರ:

  • ಚುನಾವಣೆ ನಡೆದ ಸ್ಥಳ: ಸಮರ್‌ಖಂಡ್, ಉಜ್ಬೇಕಿಸ್ತಾನ್.
  • ಒಟ್ಟು ಅರ್ಹ ಸದಸ್ಯ ರಾಷ್ಟ್ರಗಳು: ಫಿಡೆಯ 204 ಸದಸ್ಯ ರಾಷ್ಟ್ರಗಳ ಪೈಕಿ ರಷ್ಯಾ ಮತ್ತು ರುವಾಂಡಾ ಒಕ್ಕೂಟಗಳನ್ನು ಅಮಾನತುಗೊಳಿಸಿದ್ದರಿಂದ 202 ರಾಷ್ಟ್ರಗಳು ಮತದಾನಕ್ಕೆ ಅರ್ಹತೆ ಪಡೆದಿದ್ದವು.
  • ಎರಡನೇ ಸುತ್ತಿನ ಸ್ಪರ್ಧೆ: ಚುನಾವಣೆಯ ಮೊದಲ ಸುತ್ತಿನಲ್ಲಿ ತಿಮೋರ್ ತರ್ಲೊವ್ 96 ಮತಗಳನ್ನು ಪಡೆದರು. ಬಹುಮತಕ್ಕೆ 1 ಮತ ಕಡಿಮೆ ಬಿದ್ದಿದ್ದರಿಂದ ನಡೆದ ಎರಡನೇ ಸುತ್ತಿನ ಚುನಾವಣೆಯಲ್ಲಿ, ಜರ್ಮನಿಯ ವ್ಯಾಡಿಮ್ ರೋಸೆನ್‌ಸ್ಟೈನ್ (Wadim Rosenstein) ಅವರನ್ನು 110-85 ಮತಗಳ ಅಂತರದಿಂದ ಸೋಲಿಸಿ ತರ್ಲೊವ್ ಜಯಗಳಿಸಿದರು.
  • ಕಿರಿಯ ವಯಸ್ಸಿನ ಅಧ್ಯಕ್ಷ: 38 ವರ್ಷದ ತಿಮೋರ್ ತರ್ಲೊವ್, ಫಿಡೆ ಇತಿಹಾಸದಲ್ಲೇ ಅಧ್ಯಕ್ಷರಾದ ಎರಡನೇ ಅತ್ಯಂತ ಕಿರಿಯ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

➤ ಚುನಾವಣಾ ಕಣದ ಹಿನ್ನೆಲೆ (ಅರ್ಕಾಡಿ ದೊರ್ಕೋವಿಚ್ ನಿರ್ಗಮನ): ಫಿಡೆಯನ್ನು ಮುನ್ನಡೆಸುತ್ತಿದ್ದ ರಷ್ಯಾದ ಮಾಜಿ ಉಪ ಪ್ರಧಾನಿ ಅರ್ಕಾಡಿ ದೊರ್ಕೋವಿಚ್ (Arkady Dvorkovich) ಅವರು 2018 ರಿಂದ 2026 ರವರೆಗೆ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದರು. ಆದರೆ ಯುಕ್ರೇನ್ ಯುದ್ಧದ ಕಾರಣದಿಂದ ಯುರೋಪಿಯನ್ ಯೂನಿಯನ್ (EU) ನಿರ್ಬಂಧಗಳ ಪಟ್ಟಿಗೆ ಸೇರ್ಪಡೆಗೊಂಡ ನಂತರ, ಅವರು ತಮ್ಮ ಮೂರನೇ ಅವಧಿಯ ಸ್ಪರ್ಧೆಯಿಂದ ಹಿಂದೆ ಸರಿದರು.
ತರುವಾಯ ಭಾರತದ ವಿಶ್ವನಾಥನ್ ಆನಂದ್ ಅವರು ಮಧ್ಯಂತರ ಅಧ್ಯಕ್ಷರಾಗಿ ಜವಾಬ್ದಾರಿ ನಿರ್ವಹಿಸಿದ್ದರು. ಇದೀಗ ತಿಮೋರ್ ತರ್ಲೊವ್ ತಂಡದ ಜೊತೆ ಸೇರಿ ಉಪಾಧ್ಯಕ್ಷರಾಗಿ ತಮ್ಮ ಸೇವೆಯನ್ನು ಮುಂದುವರಿಸಲಿದ್ದಾರೆ.   
➤ ತಿಮೋರ್ ತರ್ಲೊವ್ ಅವರ ಪ್ರಮುಖ ಗುರಿಗಳು: 
1. ಡಿಜಿಟಲ್ ಕ್ರಾಂತಿ: ಚೆಸ್ ಕ್ರೀಡೆಯನ್ನು ಜಾಗತಿಕವಾಗಿ ತಂತ್ರಜ್ಞಾನದ ಮೂಲಕ ವಿಸ್ತರಿಸುವುದು. 
2. ಶಾಲಾ ಚೆಸ್ ಉತ್ತೇಜನ: ಶಾಲಾ ಮಟ್ಟದಲ್ಲಿ ಚೆಸ್ ಆಟವನ್ನು ಜನಪ್ರಿಯಗೊಳಿಸಲು ‘ಅಂತರರಾಷ್ಟ್ರೀಯ ಶಾಲಾ ಚೆಸ್ ಒಕ್ಕೂಟ’ (ISCF) ಮೂಲಕ ಹೆಚ್ಚಿನ ಹೂಡಿಕೆ ಮಾಡುವುದು. 
3. ಸಣ್ಣ ರಾಷ್ಟ್ರಗಳಿಗೆ ನೆರವು: ವಿಶ್ವದ ಸಣ್ಣ ಚೆಸ್ ಒಕ್ಕೂಟಗಳಿಗೆ ಆರ್ಥಿಕ ಹಾಗೂ ಮೂಲಸೌಕರ್ಯ ನೆರವು ನೀಡುವುದು.