Job Description: ➤ ದೇಶದ ನಾಗರಿಕರ ಸುರಕ್ಷತೆಗೆ ಸಂಬಂಧಿಸಿದಂತೆ ಭಾರತದ ಸರ್ವೋಚ್ಚ ನ್ಯಾಯಾಲಯ (Supreme Court) ಇತ್ತೀಚೆಗೆ ಐತಿಹಾಸಿಕ ತೀರ್ಪೊಂದನ್ನು ನೀಡಿದೆ. ರಸ್ತೆ ಬದಿಯ ಫುಟ್‌ಪಾತ್‌ಗಳಲ್ಲಿ (ಕಾಲುದಾರಿ) ಯಾವುದೇ ಆತಂಕವಿಲ್ಲದೆ ಸುರಕ್ಷಿತವಾಗಿ ನಡೆಯುವುದು ನಾಗರಿಕರ ಮೂಲಭೂತ ಹಕ್ಕು (Fundamental Right) ಎಂದು ಸುಪ್ರೀಂ ಕೋರ್ಟ್ ಘೋಷಿಸಿದೆ. ವಾಹನ ಸವಾರರ ದಬ್ಬಾಳಿಕೆ ಅಥವಾ ರಸ್ತೆಗಳ ಏಕಸ್ವಾಮ್ಯದಿಂದ ಪಾದಚಾರಿಗಳ ಹಕ್ಕನ್ನು ಕಸಿದುಕೊಳ್ಳಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.➤ ನ್ಯಾಯಮೂರ್ತಿಗಳಾದ ಪಿ. ಎಸ್. ನರಸಿಂಹ ಮತ್ತು ಅತುಲ್ ಎಸ್. ಚಂದೂರ್ಕರ್ ಅವರನ್ನೊಳಗೊಂಡ ದ್ವಿಸದಸ್ಯ ಪೀಠವು ಈ ಮಹತ್ವದ ತೀರ್ಪನ್ನು ಪ್ರಕಟಿಸಿದೆ. ಶಾಲಾ ಆವರಣದ ಬಳಿ ಫುಟ್‌ಪಾತ್ ಅಥವಾ ಪಾದಚಾರಿ ರಸ್ತೆ ಇಲ್ಲದ ಕಾರಣ, ಟ್ಯಾಂಕರ್ ಡಿಕ್ಕಿಯಾಗಿ ಐದು ವರ್ಷದ ಮಗು ಮೃತಪಟ್ಟ ದುರದೃಷ್ಟಕರ ರಸ್ತೆ ಅಪಘಾತದ ಪರಿಹಾರ ಪ್ರಕರಣದ ವಿಚಾರಣೆ ನಡೆಸುವಾಗ ನ್ಯಾಯಾಲಯ ಈ ಆದೇಶ ನೀಡಿದೆ. ವಾಹನಗಳ ಚಲನೆಗಿಂತ ಫುಟ್‌ಪಾತ್‌ಗಳಲ್ಲಿ ಪಾದಚಾರಿಗಳು ಸುರಕ್ಷಿತವಾಗಿ ನಡೆಯುವ ಹಕ್ಕಿಗೆ ಮೊದಲ ಆದ್ಯತೆ ನೀಡಬೇಕು ಎಂದು ನ್ಯಾಯಾಲಯ ಪ್ರತಿಪಾದಿಸಿದೆ.➤ ಸಂವಿಧಾನದ ಯಾವ ವಿಧಿಗಳ ಅಡಿಯಲ್ಲಿ ಈ ಹಕ್ಕು ಬರುತ್ತದೆ? ವಿಧಿ 19(1)(d) - ಮುಕ್ತ ಸಂಚಾರದ ಹಕ್ಕು: ಭಾರತದಾದ್ಯಂತ ಮುಕ್ತವಾಗಿ ಸಂಚರಿಸುವ ಹಕ್ಕನ್ನು ಇದು ಒಳಗೊಂಡಿದೆ. ಸುಪ್ರೀಂ ಕೋರ್ಟ್ ಪ್ರಕಾರ, ಚಕ್ರಗಳು (ವಾಹನಗಳು) ಕಂಡುಹಿಡಿಯುವುದಕ್ಕಿಂತ ಮುಂಚೆಯೇ ಮಾನವ ನಡೆಯಲು ಪ್ರಾರಂಭಿಸಿದ್ದನು. ಆದ್ದರಿಂದ ಮುಕ್ತ ಸಂಚಾರದ ಹಕ್ಕಿನಲ್ಲಿ ಮೊದಲ ಆದ್ಯತೆ 'ನಡೆಯುವ ಹಕ್ಕಿಗೆ' (Right to Walk) ಸೇರಿದ್ದಾಗಿದೆ. ವಿಧಿ 21 - ಜೀವಿಸುವ ಮತ್ತು ವೈಯಕ್ತಿಕ ಸ್ವಾತಂತ್ರ್ಯದ ಹಕ್ಕು: ಸುರಕ್ಷಿತವಾದ ಪರಿಸರದಲ್ಲಿ ಜೀವಿಸುವುದು ಪ್ರತಿಯೊಬ್ಬ ನಾಗರಿಕನ ಹಕ್ಕಾಗಿದೆ. ಫುಟ್‌ಪಾತ್‌ಗಳ ಕೊರತೆಯಿಂದಾಗಿ ಪಾದಚಾರಿಗಳು ರಸ್ತೆಯಲ್ಲೇ ನಡೆದು ಪ್ರಾಣ ಕಳೆದುಕೊಳ್ಳುವುದು ಈ ವಿಧಿಯ ಉಲ್ಲಂಘನೆಯಾಗಿದೆ. ➤ ಇದಲ್ಲದೆ, ಪಾದಚಾರಿ ಹಕ್ಕುಗಳು ಸಂವಿಧಾನದ ವಿಧಿ 19(1)(a) (ಅಭಿವ್ಯಕ್ತಿ ಸ್ವಾತಂತ್ರ್ಯ), 19(1)(b) (ಸಭೆ ಸೇರುವ ಹಕ್ಕು) ಮತ್ತು 19(1)(c) (ಸಂಘಟನೆಗಳನ್ನು ರಚಿಸುವ ಹಕ್ಕು) ಗಳೊಂದಿಗೂ ನಿಕಟ ಸಂಪರ್ಕ ಹೊಂದಿವೆ ಎಂದು ನ್ಯಾಯಾಲಯ ಉಲ್ಲೇಖಿಸಿದೆ.
