* ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ವಿಶೇಷ ಗಮನಕ್ಕೆ ಒಳಪಟ್ಟಿರುವ ನೆರೆಹೊರೆ ನೀತಿಯ ಭಾಗವಾಗಿ, ವಿದೇಶಾಂಗ ವ್ಯವಹಾರಗಳ ಸಚಿವ ಡಾ. ಎಸ್. ಜೈಶಂಕರ್ ಅವರು ರಾಯಭಾರಿಯಾಗಿ ಮಂಗಳವಾರ ( December-23) ಶ್ರೀಲಂಕಾಗೆ ಭೇಟಿ ನೀಡಿದ್ದಾರೆ. ಈ ಪ್ರವಾಸದ ವೇಳೆ, ದಿತ್ವಾ ಚಂಡಮಾರುತದಿಂದ ತೀವ್ರ ಹಾನಿಗೊಳಗಾದ ಶ್ರೀಲಂಕಾದ ಪುನಶ್ಚೇತನಕ್ಕೆ ಭಾರತವು 450 ಮಿಲಿಯನ್ ಡಾಲರ್ ಮೊತ್ತದ ಸಮಗ್ರ ಪರಿಹಾರ ಹಾಗೂ ಪುನರ್ ನಿರ್ಮಾಣ ಪ್ಯಾಕೇಜ್ ಅನ್ನು ಘೋಷಿಸಿದೆ. ಡಿಸೆಂಬರ್ 23, 2025ರಂದು ಕೊಲಂಬೊದಲ್ಲಿ ಈ ಘೋಷಣೆ ಮಾಡಿದ ಡಾ. ಜೈಶಂಕರ್ ಅವರು, ಈ ಸಂಕಷ್ಟದ ಸಂದರ್ಭದಲ್ಲಿ ಭಾರತವು ಶ್ರೀಲಂಕಾದೊಂದಿಗೆ “ದೃಢವಾಗಿ ನಿಲ್ಲುತ್ತದೆ” ಎಂದು ಸ್ಪಷ್ಟಪಡಿಸಿದ್ದು, ಎರಡೂ ದೇಶಗಳ ನಡುವಿನ ಸ್ನೇಹಪೂರ್ಣ ಹಾಗೂ ಸಹಕಾರದ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸಿದೆ.
* ಈ ಪ್ಯಾಕೇಜ್‌ನಲ್ಲಿ $350 ಮಿಲಿಯನ್ ರಿಯಾಯಿತಿ ಸಾಲಗಳು ಹಾಗೂ $100 ಮಿಲಿಯನ್ ಅನುದಾನಗಳು ಸೇರಿದ್ದು, ಚಂಡಮಾರುತದಿಂದ ಹೆಚ್ಚು ಹಾನಿಗೊಳಗಾದ ಪ್ರಮುಖ ವಲಯಗಳ ಪುನರುಜ್ಜೀವನಕ್ಕೆ ನೆರವಾಗಲಿದೆ. ರಸ್ತೆ, ರೈಲ್ವೆ ಮತ್ತು ಸೇತುವೆ ಸಂಪರ್ಕಗಳ ಪುನರ್ ಸ್ಥಾಪನೆ, ಸಂಪೂರ್ಣ ಹಾಗೂ ಭಾಗಶಃ ಹಾನಿಗೊಳಗಾದ ಮನೆಗಳ ಪುನರ್ ನಿರ್ಮಾಣ, ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರಗಳಿಗೆ ವಿಶೇಷ ಸಹಾಯ, ಕೃಷಿ ಕ್ಷೇತ್ರದಲ್ಲಿ ಉಂಟಾಗುವ ತಾತ್ಕಾಲಿಕ ಹಾಗೂ ಮಧ್ಯಮ ಅವಧಿಯ ಕೊರತೆಗಳ ಪರಿಹಾರ, ಜೊತೆಗೆ ವಿಪತ್ತು ಪ್ರತಿಕ್ರಿಯೆ ಮತ್ತು ಸಿದ್ಧತೆಯನ್ನು ಬಲಪಡಿಸುವುದು ಈ ಸಹಾಯದ ಪ್ರಮುಖ ಉದ್ದೇಶಗಳಾಗಿವೆ.
* ಕೊಲಂಬೊದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಶ್ರೀಲಂಕಾದ ವಿದೇಶಾಂಗ ಸಚಿವೆ ವಿಜಿತಾ ಹೆರಾತ್ ಅವರೊಂದಿಗೆ ಮಾತನಾಡಿದ ಡಾ. ಜೈಶಂಕರ್, ಭಾರತ–ಶ್ರೀಲಂಕಾ ನಡುವಿನ ಆಳವಾದ ಸ್ನೇಹ ಮತ್ತು ಸಹೋದರತ್ವದ ಬಾಂಧವ್ಯವನ್ನು ಈ ನೆರವು ಪ್ರತಿಬಿಂಬಿಸುತ್ತದೆ ಎಂದು ಹೇಳಿದರು. ಈ ವೇಳೆ ಉತ್ತರ ಪ್ರಾಂತ್ಯದ ಕಿಲಿನೊಚ್ಚಿ ಜಿಲ್ಲೆಯಲ್ಲಿ 120 ಅಡಿ ದ್ವಿಮುಖ ಸಾಗಣೆ ಬೈಲಿ ಸೇತುವೆಯನ್ನು ಇಬ್ಬರು ಜಂಟಿಯಾಗಿ ಉದ್ಘಾಟಿಸಿದರು. ದಿತ್ವಾ ಚಂಡಮಾರುತದಿಂದ ತೀವ್ರ ಹಾನಿಗೊಳಗಾದ ಈ ಪ್ರದೇಶದಲ್ಲಿ ಸಂಪರ್ಕ ಪುನರ್ ಸ್ಥಾಪನೆಗೆ ಈ ಸೇತುವೆ ಮಹತ್ವದ ಪಾತ್ರ ವಹಿಸಲಿದೆ.
* ಡಾ. ಜೈಶಂಕರ್ ಅವರು ಶ್ರೀಲಂಕಾ ಪ್ರಧಾನಿ ಹರಿಣಿ ಅಮರಸೂರ್ಯ ಹಾಗೂ ಅಧ್ಯಕ್ಷ ಅನುರ ಕುಮಾರ ದಿಸ್ನಾಯಕಾ ಅವರನ್ನು ಭೇಟಿ ಮಾಡಿ, ಚಂಡಮಾರುತದ ನಂತರದ ಪುನರ್ ನಿರ್ಮಾಣಕ್ಕೆ ಭಾರತದ ದೃಢ ಬದ್ಧತೆಯನ್ನು ಪುನರುಚ್ಚರಿಸಿದರು. ಪ್ರಧಾನಿ ನರೇಂದ್ರ ಮೋದಿ ಅವರ ಆತ್ಮೀಯ ಶುಭಾಶಯಗಳು ಮತ್ತು ಒಗ್ಗಟ್ಟಿನ ಸಂದೇಶವನ್ನೂ ಈ ಸಂದರ್ಭದಲ್ಲಿ ಅವರು ತಿಳಿಸಿದರು.
* ಆಪರೇಷನ್ ಸಾಗರ್ ಬಂಧು, ನೆರೆಹೊರೆ ಮೊದಲು ಮತ್ತು ವಿಷನ್ ಮಹಾಸಾಗರ್ ತತ್ವಗಳ ಅಡಿಯಲ್ಲಿ, ಮಾನವೀಯ ನೆರವು ಹಾಗೂ ಅಭಿವೃದ್ಧಿ ಸಹಕಾರದ ಮೂಲಕ ಭಾರತವು ಶ್ರೀಲಂಕಾದೊಂದಿಗೆ ತನ್ನ ಅಚಲ ಸ್ನೇಹವನ್ನು ಮತ್ತೊಮ್ಮೆ ದೃಢಪಡಿಸಿದೆ.