Job Description: ➤ ಇರಾನ್ ಮತ್ತು ಇಸ್ರೇಲ್ ನಡುವಿನ ಸಂಘರ್ಷ ಕೇವಲ ಯುದ್ಧಭೂಮಿಗೆ ಸೀಮಿತವಾಗಿಲ್ಲ. ಇದು ನಿಮ್ಮ ಕೈಯಲ್ಲಿರುವ ಮೊಬೈಲ್‌ನ ಇಂಟರ್ನೆಟ್ ವೇಗ ಮತ್ತು ಜಾಗತಿಕ ಡಿಜಿಟಲ್ ಆರ್ಥಿಕತೆಯ ಮೇಲೂ ಗಂಭೀರ ಪರಿಣಾಮ ಬೀರಲಿದೆ. ಹರ್ಮುಜ್ ಜಲಸಂಧಿ (Strait of Hormuz) ಎಂದರೆ ಕೇವಲ ಪೆಟ್ರೋಲಿಯಂ ಸಾಗಿಸುವ ಹಾದಿ ಎಂದು ನಾವಂದುಕೊಂಡಿದ್ದೇವೆ, ಆದರೆ ವಾಸ್ತವದಲ್ಲಿ ಇದು ಜಗತ್ತಿನ ಪ್ರಮುಖ 'ಇಂಟರ್ನೆಟ್ ಕಾರಿಡಾರ್' ಕೂಡ ಹೌದು.➤ ಇಂಟರ್ನೆಟ್ ಕಾರಿಡಾರ್: ಹರ್ಮುಜ್ ಜಲಸಂಧಿಯ ತಳಭಾಗದಲ್ಲಿ ಸಾವಿರಾರು ಕಿಲೋಮೀಟರ್ ಉದ್ದದ ಜಲಾಂತರ್ಗಾಮಿ ಫೈಬರ್-ಆಪ್ಟಿಕ್ ಕೇಬಲ್‌ಗಳ (Submarine Cables) ದಟ್ಟವಾದ ಜಾಲವಿದೆ. ಏಷ್ಯಾ, ಮಧ್ಯಪ್ರಾಚ್ಯ ಮತ್ತು ಯುರೋಪ್ ಖಂಡಗಳನ್ನು ಡಿಜಿಟಲ್ ರೂಪದಲ್ಲಿ ಜೋಡಿಸುವ ಮಹತ್ವದ ಕೊಂಡಿ ಇದಾಗಿದೆ. ನಮ್ಮ ದೈನಂದಿನ ಡಿಜಿಟಲ್ ಪಾವತಿಗಳು, ಕ್ಲೌಡ್ ಕಂಪ್ಯೂಟಿಂಗ್, ವಿಡಿಯೋ ಕಾನ್ಫರೆನ್ಸಿಂಗ್ ಮತ್ತು ಸಾಮಾಜಿಕ ಜಾಲತಾಣಗಳ ದತ್ತಾಂಶಗಳು (Data) ಇದೇ ಮಾರ್ಗವಾಗಿ ಹಾದುಹೋಗುತ್ತವೆ.➤ ಭಾರತದ ಮೇಲೆ ಇದರ ಪರಿಣಾಮ: ಭಾರತವು ಇಂದು ಡಿಜಿಟಲ್ ವ್ಯವಹಾರಗಳಲ್ಲಿ ಜಗತ್ತಿನ ನಾಯಕ. ನಮ್ಮ ದೇಶದ ಒಟ್ಟು ಇಂಟರ್ನೆಟ್ ಸಂಚಾರದ ಸುಮಾರು ಮೂರನೇ ಒಂದು ಭಾಗ (1/3rd) ಈ ಹರ್ಮುಜ್ ಜಲಸಂಧಿಯ ಸುತ್ತಮುತ್ತಲಿನ ಕೇಬಲ್‌ಗಳನ್ನು ಅವಲಂಬಿಸಿದೆ. ಭಾರತಕ್ಕೆ ಸಂಪರ್ಕ ನೀಡುವ ಪ್ರಮುಖ ಕೇಬಲ್ ವ್ಯವಸ್ಥೆಗಳೆಂದರೆ:- SEA-ME-WE 4: ಆಗ್ನೇಯ ಏಷ್ಯಾ, ಮಧ್ಯಪ್ರಾಚ್ಯ ಮತ್ತು ಯುರೋಪ್ ಅನ್ನು ಸಂಪರ್ಕಿಸುತ್ತದೆ.- IMEWE (India-Middle East-Western Europe): ಭಾರತದಿಂದ ಯುರೋಪ್‌ಗೆ ಇರುವ ಪ್ರಮುಖ ಡಿಜಿಟಲ್ ಹೆದ್ದಾರಿ.- FALCON: ಭಾರತವನ್ನು ಗಲ್ಫ್ ರಾಷ್ಟ್ರಗಳೊಂದಿಗೆ ನೇರವಾಗಿ ಸಂಪರ್ಕಿಸುವ ವ್ಯವಸ್ಥೆ.➤ ಯುದ್ಧದ ಸಮಯದಲ್ಲಿ ಇಂಟರ್ನೆಟ್ ಕಡಿತವಾಗಲು ಎರಡು ಮುಖ್ಯ ಕಾರಣಗಳಿರಬಹುದು:- ಉದ್ದೇಶಪೂರ್ವಕ ದಾಳಿ: ಶತ್ರು ರಾಷ್ಟ್ರಗಳ ಸಂವಹನ ಕಡಿತಗೊಳಿಸಲು ಇರಾನ್ ಅಥವಾ ಇತರ ಶಕ್ತಿಗಳು ಈ ಕೇಬಲ್‌ಗಳನ್ನು ಗುರಿಯಾಗಿಸಬಹುದು.- ಅಚಾತುರ್ಯ: ಯುದ್ಧ ಹಡಗುಗಳ ಲಂಗರುಗಳು (Anchors) ಆಕಸ್ಮಿಕವಾಗಿ ಸಮುದ್ರದ ತಳದಲ್ಲಿರುವ ಕೇಬಲ್‌ಗಳಿಗೆ ತಗುಲಿ ಅವು ತುಂಡಾಗಬಹುದು.- ಒಂದು ವೇಳೆ ಕೇಬಲ್ ತುಂಡಾದರೆ, ಅದನ್ನು ಸರಿಪಡಿಸಲು ವಿಶೇಷ ಹಡಗುಗಳು ಮತ್ತು ತಾಂತ್ರಿಕ ತಜ್ಞರು ಬೇಕು. ಆದರೆ ಯುದ್ಧ ನಡೆಯುತ್ತಿರುವ ಅಪಾಯಕಾರಿ ವಲಯಕ್ಕೆ ಇಂತಹ ಹಡಗುಗಳು ಹೋಗಲು ಸಿದ್ಧವಿರುವುದಿಲ್ಲ. ಇದರಿಂದಾಗಿ ಇಂಟರ್ನೆಟ್ ಸ್ಥಗಿತ ದೀರ್ಘಕಾಲ ಮುಂದುವರಿಯಬಹುದು.➤ ಡಿಜಿಟಲ್ ಬ್ಲ್ಯಾಕ್‌ಔಟ್: ಒಂದು ವೇಳೆ ಹರ್ಮುಜ್ ಜಲಸಂಧಿಯಲ್ಲಿ ಕೇಬಲ್ ಹಾನಿಯಾದರೆ, ಗೂಗಲ್, ಫೇಸ್‌ಬುಕ್ ಅಥವಾ ವಿದೇಶಿ ಸರ್ವರ್‌ಗಳ ಮೂಲಕ ನಡೆಯುವ ಸೇವೆಗಳು ಸ್ಥಗಿತಗೊಳ್ಳಬಹುದು ಅಥವಾ ವೇಗ ಕುಂಠಿತವಾಗಬಹುದು. ಇದು ವಿಶೇಷವಾಗಿ ಭಾರತದ ಐಟಿ (IT) ಕಂಪನಿಗಳು ಮತ್ತು ಬ್ಯಾಂಕಿಂಗ್ ವಲಯಕ್ಕೆ ಭಾರಿ ಪೆಟ್ಟು ನೀಡಲಿದೆ.➤ ಸಂಪೂರ್ಣವಾಗಿ ಇಂಟರ್ನೆಟ್ ಸ್ಥಗಿತಗೊಳ್ಳದಿದ್ದರೂ, ದತ್ತಾಂಶ ಸಂಚಾರವನ್ನು ಬೇರೆ ಮಾರ್ಗಗಳಿಗೆ (Rerouting) ಬದಲಿಸಬೇಕಾಗುತ್ತದೆ. ಇದರಿಂದ ಇಂಟರ್ನೆಟ್ ವೇಗ ಗಣನೀಯವಾಗಿ ಕಡಿಮೆಯಾಗಿ ಆರ್ಥಿಕ ನಷ್ಟ ಸಂಭವಿಸುವ ಸಾಧ್ಯತೆ ಇದೆ ಎಂದು ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.
