Job Description: * ಭಾರತದಲ್ಲಿ ಅಣು ವಿದ್ಯುತ್‌ ಉತ್ಪಾದನೆಯನ್ನು ವಿಸ್ತರಿಸುವ ಉದ್ದೇಶದೊಂದಿಗೆ ರಷ್ಯಾ ಮಹತ್ವದ ಮತ್ತು ನವೀನ ಯೋಜನೆಯನ್ನು ಮುಂದಿಟ್ಟಿದೆ. ಭಾರತದ ಅಧಿಪತ್ಯದಲ್ಲಿರುವ ಸಮುದ್ರ ಪ್ರದೇಶದಲ್ಲಿ ತೇಲುವ ಅಣು ವಿದ್ಯುತ್‌ ಸ್ಥಾವರ (Floating Nuclear Power Plant) ನಿರ್ಮಿಸಲು ಸಿದ್ಧವಿರುವುದಾಗಿ ರಷ್ಯಾ ಸೂಚಿಸಿದೆ. ತಮಿಳುನಾಡಿನ ಕೂಡುಕುಳಂ ಅಣು ವಿದ್ಯುತ್‌ ಸ್ಥಾವರದ ಸಹಕಾರ ವಿಸ್ತರಣೆ ಕುರಿತು ನಡೆದ ಚರ್ಚೆಗಳ ಸಂದರ್ಭದಲ್ಲಿ ಈ ಹೊಸ ಆಲೋಚನೆಯೂ ಪ್ರಸ್ತಾಪಕ್ಕೆ ಬಂದಿದೆ ಎಂದು ತಿಳಿದುಬಂದಿದೆ.* ಸಾಂಪ್ರದಾಯಿಕ ಭೂ ಆಧಾರಿತ ಅಣು ವಿದ್ಯುತ್‌ ಸ್ಥಾವರಗಳಿಗಿಂತ ಭಿನ್ನವಾಗಿ, ಈ ತಂತ್ರಜ್ಞಾನದಲ್ಲಿ ಸಣ್ಣ ಗಾತ್ರದ ಅಣು ರಿಯಾಕ್ಟರ್‌ಗಳನ್ನು ವಿಶೇಷ ಹಡಗುಗಳ ಮೇಲೆ ಸ್ಥಾಪಿಸಿ ಸಮುದ್ರದಲ್ಲೇ ವಿದ್ಯುತ್‌ ಉತ್ಪಾದಿಸಲಾಗುತ್ತದೆ. ವಿಶಾಲ ಸಾಗರ ಪ್ರದೇಶ ಲಭ್ಯವಾಗಿರುವುದರಿಂದ ಭೂ ಸ್ವಾಧೀನ ಸಮಸ್ಯೆ ತಪ್ಪಿಸಿ, ಬೇಗನೆ ವಿದ್ಯುತ್‌ ಪೂರೈಕೆಯನ್ನು ಒದಗಿಸಲು ಇದು ಅನುಕೂಲಕರ ವಿಧಾನವೆಂದು ರಷ್ಯಾ ಅಭಿಪ್ರಾಯಪಟ್ಟಿದೆ.* ಈ ಮಾದರಿಯ ವಿದ್ಯುತ್‌ ಸ್ಥಾವರಕ್ಕೆ ಉದಾಹರಣೆಯಾಗಿ, ರಷ್ಯಾ ಈಗಾಗಲೇ ‘ಅಕಾಡೆಮಿಕ್ ಲೊಮೊನ್‌ಸೋವ್’ ಹೆಸರಿನ ತೇಲುವ ಅಣು ವಿದ್ಯುತ್‌ ಘಟಕವನ್ನು ಯಶಸ್ವಿಯಾಗಿ ಕಾರ್ಯನಿರ್ವಹಣೆಗೆ ತಂದಿದ್ದು, ಅದನ್ನು ಭಾರತದಲ್ಲೂ ಅನ್ವಯಿಸಬಹುದಾದ ಮಾದರಿಯಾಗಿ ನಿರೂಪಿಸಿದೆ.
