➤ ಭಾರತೀಯ ರಿಸರ್ವ್ ಬ್ಯಾಂಕ್ (RBI), AU ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಆಗಿ ಸಂಜಯ್ ಅಗರ್ವಾಲ್ ಅವರ ಮರುನೇಮಕಕ್ಕೆ ಅಧಿಕೃತವಾಗಿ ಅನುಮೋದನೆ ನೀಡಿದೆ. ಏಪ್ರಿಲ್ 19, 2026 ರಿಂದ ಜಾರಿಗೆ ಬರುವಂತೆ ಮುಂದಿನ ಮೂರು ವರ್ಷಗಳ ಅವಧಿಗೆ (ಏಪ್ರಿಲ್ 2029 ರವರೆಗೆ) ಈ ನೇಮಕಾತಿ ನಡೆದಿದೆ. ಬ್ಯಾಂಕ್ ಈಗ ಪೂರ್ಣ ಪ್ರಮಾಣದ 'ಯುನಿವರ್ಸಲ್ ಬ್ಯಾಂಕ್' ಆಗಿ ಪರಿವರ್ತನೆಗೊಳ್ಳುತ್ತಿರುವ ನಿರ್ಣಾಯಕ ಹಂತದಲ್ಲಿದ್ದು, ಅಗರ್ವಾಲ್ ಅವರ ನಾಯಕತ್ವದ ಮುಂದುವರಿಕೆಯು ಸಂಸ್ಥೆಯ ಸ್ಥಿರತೆ, ಬಲವಾದ ಆಡಳಿತ ಮತ್ತು ಭವಿಷ್ಯದ ಬೆಳವಣಿಗೆಗೆ ಪೂರಕವಾಗಿದೆ ಎಂದು ವಿಶ್ಲೇಷಿಸಲಾಗಿದೆ. ಡಿಸೆಂಬರ್ 2025 ರಲ್ಲಿ ಷೇರುದಾರರ ಒಪ್ಪಿಗೆ ಪಡೆದಿದ್ದ ಈ ನಿರ್ಧಾರಕ್ಕೆ ಈಗ ರಿಸರ್ವ್ ಬ್ಯಾಂಕ್ ಅಂತಿಮ ಮುದ್ರೆ ಒತ್ತಿರುವುದು ಬ್ಯಾಂಕಿಂಗ್ ವಲಯದಲ್ಲಿ ಮಹತ್ವದ ಬೆಳವಣಿಗೆಯಾಗಿದೆ.
➤ ಸಂಜಯ್ ಅಗರ್ವಾಲ್ ಅವರು ಈ ಬ್ಯಾಂಕಿನ ಸಂಸ್ಥಾಪಕರಾಗಿದ್ದು, ದೀರ್ಘಕಾಲದಿಂದ ಸಂಸ್ಥೆಯನ್ನು ಮುನ್ನಡೆಸುತ್ತಿದ್ದಾರೆ: 
- 2008: 'AU ಫೈನಾನ್ಶಿಯರ್ಸ್' ಸಂಸ್ಥೆಯ MD ಆಗಿ ನೇಮಕ.
- 2017: ಸಂಸ್ಥೆಯು ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಆಗಿ ಪರಿವರ್ತನೆಗೊಂಡಾಗ MD ಮತ್ತು CEO ಆಗಿ ಅಧಿಕಾರ ಸ್ವೀಕಾರ.
- 2026: ಇದು ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಆಗಿ ಪರಿವರ್ತನೆಗೊಂಡ ನಂತರ RBI ಅನುಮೋದಿಸಿದ ಇವರ ಸತತ 3ನೇ ಅವಧಿಯಾಗಿದೆ.
➤ ಯುನಿವರ್ಸಲ್ ಬ್ಯಾಂಕ್ ಆಗಿ ಪರಿವರ್ತನೆ: AU ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಕಳೆದ ಒಂದು ದಶಕದಲ್ಲಿ ಯುನಿವರ್ಸಲ್ ಬ್ಯಾಂಕ್ (ಪೂರ್ಣ ಪ್ರಮಾಣದ ವಾಣಿಜ್ಯ ಬ್ಯಾಂಕ್) ಆಗಿ ಬದಲಾಗಲು RBI ನಿಂದ 'ಇನ್-ಪ್ರಿನ್ಸಿಪಲ್' (ತಾತ್ವಿಕ) ಅನುಮೋದನೆ ಪಡೆದ ಮೊದಲ SFB ಆಗಿದೆ.
(ಯುನಿವರ್ಸಲ್ ಬ್ಯಾಂಕ್‌ಗಳು ಸಾಮಾನ್ಯ ಬ್ಯಾಂಕಿಂಗ್ ಜೊತೆಗೆ ವಿಮೆ, ಹೂಡಿಕೆ ಮತ್ತು ಕಾರ್ಪೊರೇಟ್ ಸಾಲಗಳಂತಹ ಎಲ್ಲಾ ರೀತಿಯ ಹಣಕಾಸು ಸೇವೆಗಳನ್ನು ನೀಡಲು ಮುಕ್ತವಾಗಿರುತ್ತವೆ. ಇದು ಬ್ಯಾಂಕಿಗೆ ಕಡಿಮೆ ವೆಚ್ಚದಲ್ಲಿ ಠೇವಣಿಗಳನ್ನು ಸಂಗ್ರಹಿಸಲು ಮತ್ತು ದೊಡ್ಡ ಮಟ್ಟದ ಸಾಲ ನೀಡಲು ಸಹಾಯ ಮಾಡುತ್ತದೆ.) 
➤AU ಸ್ಮಾಲ್ ಫೈನಾನ್ಸ್ ಬ್ಯಾಂಕ್ (AU SFB) : ರಾಜಸ್ಥಾನದ ಜೈಪುರದಲ್ಲಿ ಪ್ರಧಾನ ಕಚೇರಿಯನ್ನು ಹೊಂದಿರುವ ಹಾಗೂ 1996ರಲ್ಲಿ ಸಂಜಯ್ ಅಗರ್ವಾಲ್ ಅವರಿಂದ 'AU ಫೈನಾನ್ಶಿಯರ್ಸ್' ಹೆಸರಿನಲ್ಲಿ ಸ್ಥಾಪಿಸಲ್ಪಟ್ಟು 2017ರಲ್ಲಿ ಪೂರ್ಣ ಪ್ರಮಾಣದ ಬ್ಯಾಂಕ್ ಆಗಿ ಪರಿವರ್ತನೆಗೊಂಡಿರುವ AU ಸ್ಮಾಲ್ ಫೈನಾನ್ಸ್ ಬ್ಯಾಂಕ್, "ಚಲೋ ಆಗೆ ಬಢೇ" ಎಂಬ ಧ್ಯೇಯವಾಕ್ಯದೊಂದಿಗೆ ಇಂದು ಭಾರತದ ಅತಿದೊಡ್ಡ ಮತ್ತು ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಖಾಸಗಿ ವಲಯದ ಸ್ಮಾಲ್ ಫೈನಾನ್ಸ್ ಬ್ಯಾಂಕ್‌ಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿದೆ.
➤  ಬ್ಯಾಂಕ್ ಇತ್ತೀಚೆಗೆ ತನ್ನ ಮೂರನೇ ತ್ರೈಮಾಸಿಕದ ಆರ್ಥಿಕ ವರದಿಯನ್ನು ಬಿಡುಗಡೆ ಮಾಡಿದ್ದು, ಅದ್ಭುತ ಪ್ರಗತಿ ಸಾಧಿಸಿದೆ:
- ನಿವ್ವಳ ಲಾಭ: ₹667.65 ಕೋಟಿ (ಕಳೆದ ವರ್ಷಕ್ಕಿಂತ 26% ಏರಿಕೆ).
- ನಿವ್ವಳ ಬಡ್ಡಿ ಆದಾಯ (NII): ₹2,341.26 ಕೋಟಿ (15.7% ಏರಿಕೆ).
- ಒಟ್ಟು ಆಸ್ತಿ: ಡಿಸೆಂಬರ್ ಅಂತ್ಯಕ್ಕೆ ಸುಮಾರು ₹1.30 ಲಕ್ಷ ಕೋಟಿ ತಲುಪಿದೆ.