Job Description: ➤ ದೇಶೀಯ ರಕ್ಷಣಾ ಉತ್ಪಾದನಾ ವಲಯದಲ್ಲಿ "ಆತ್ಮನಿರ್ಭರ ಭಾರತ" ಮತ್ತು "ಮೇಕ್ ಇನ್ ಇಂಡಿಯಾ" ಪರಿಕಲ್ಪನೆಗೆ ಮತ್ತೊಂದು ಮಹತ್ವದ ಯಶಸ್ಸು ಸಿಕ್ಕಿದೆ. ಭಾರತೀಯ ನೌಕಾಪಡೆಯ ಕಡಲ ಸಾಮರ್ಥ್ಯವನ್ನು ವಿಸ್ತರಿಸುವ ನಿಟ್ಟಿನಲ್ಲಿ ಅತ್ಯಾಧುನಿಕ ತಂತ್ರಜ್ಞಾನದ ನೆಕ್ಸ್ಟ್ ಜನರೇಷನ್ ಆಫ್‌ಶೋರ್ ಪೆಟ್ರೋಲ್ ವೆಸಲ್ (NGOPV) ಸರಣಿಯ ಮೊದಲ ಯುದ್ಧನೌಕೆ 'ಸಂಘಮಿತ್ರ' (Sanghamitra) ಇತ್ತೀಚೆಗೆ ಕೋಲ್ಕತಾದಲ್ಲಿ ಜಲಪ್ರವೇಶ ಮಾಡಿದೆ. ➤ ರಕ್ಷಣಾ ವಲಯದ ಸಾರ್ವಜನಿಕ ಸ್ವಾಮ್ಯದ ಪ್ರಮುಖ ಸಂಸ್ಥೆಯಾದ ಗಾರ್ಡನ್ ರೀಚ್ ಶಿಪ್‌ಬಿಲ್ಡರ್ಸ್ ಅಂಡ್ ಇಂಜಿನಿಯರ್ಸ್ (GRSE) ಈ ಅತ್ಯಾಧುನಿಕ ಯುದ್ಧನೌಕೆಯನ್ನು ನಿರ್ಮಿಸಿದೆ. ನೌಕಾಪಡೆಯ ಉಪ ಮುಖ್ಯಸ್ಥರಾದ ವೈಸ್ ಅಡ್ಮಿರಾಲ್ ಸಂಜಯ್ ವಾತ್ಸಾಯನ ಮತ್ತು ಅವರ ಧರ್ಮಪತ್ನಿ ಸರಿತಾ ವಾತ್ಸಾಯನ ಅವರ ಉಪಸ್ಥಿತಿಯಲ್ಲಿ ನಡೆದ ಭವ್ಯ ಸಮಾರಂಭದಲ್ಲಿ ಧಾರ್ಮಿಕ ವಿಧಿವಿಧಾನಗಳೊಂದಿಗೆ ಈ ನೌಕೆಯನ್ನು ಸಮುದ್ರಕ್ಕೆ ಇಳಿಸಲಾಯಿತು.➤ ಸಂಘಮಿತ್ರ' ಯುದ್ಧನೌಕೆ : ಈ ಯುದ್ಧನೌಕೆಯು 113 ಮೀಟರ್ ಉದ್ದ ಹಾಗೂ 14.6 ಮೀಟರ್ ಅಗಲವನ್ನು ಹೊಂದಿದ್ದು, ಸುಮಾರು 3,000 ಟನ್ ತೂಕ ಸ್ಥಳಾಂತರ (Displacement) ಸಾಮರ್ಥ್ಯವನ್ನು ಹೊಂದಿದೆ. ಇದು ಗಂಟೆಗೆ ಗರಿಷ್ಠ 23 ನಾಟ್ (Knots) ವೇಗದಲ್ಲಿ ಚಲಿಸಬಲ್ಲದು. ಅತ್ಯಾಧುನಿಕ ಇಂಧನ ದಕ್ಷತೆ ಹೊಂದಿರುವ ಈ ನೌಕೆ ಒಮ್ಮೆ ಇಂಧನ ತುಂಬಿಸಿದರೆ ಬರೋಬ್ಬರಿ 8,500 ನಾಟಿಕಲ್ ಮೈಲಿಗಳಷ್ಟು ದೂರ ನಿರಂತರವಾಗಿ ಪ್ರಯಾಣಿಸುವ ಸಾಮರ್ಥ್ಯ ಪಡೆದಿದೆ. ಈ ನೌಕೆಗೆ ಸಾಮ್ರಾಟ್ ಅಶೋಕನ ಮಗಳಾದ 'ಸಂಘಮಿತ್ರ' ಅವರ ಹೆಸರನ್ನು ಇಡಲಾಗಿದೆ. ಇದರ ಲಾಂಛನದಲ್ಲಿ (Crest) 'ಸಪ್ತರ್ಷಿ ಮಂಡಲ' (Ursa Major) ನಕ್ಷತ್ರ ಪುಂಜ ಮತ್ತು ಕೆಂಪು-ಬಿಳಿ ಬಣ್ಣದ ಲೈಟ್‌ಹೌಸ್ (ದೀಪದ ಮನೆ) ಚಿತ್ರಿಸಲಾಗಿದೆ.➤ ನೌಕೆಯನ್ನು ಬಳಸುವ ಪ್ರಮುಖ ಉದ್ದೇಶಗಳು:- ಕಡಲ ತೀರದ ಆಸ್ತಿಗಳ ರಕ್ಷಣೆ: ಭಾರತದ ಕಡಲ ತೀರದಲ್ಲಿರುವ ತೈಲ ನಿಕ್ಷೇಪಗಳು ಹಾಗೂ ಆರ್ಥಿಕ ವಲಯಗಳ (EEZ) ಭದ್ರತೆ.-ಕಡಲ್ಗಳ್ಳತನ ತಡೆ (Anti-Piracy): ಹಿಂದೂ ಮಹಾಸಾಗರದಲ್ಲಿ ಹೆಚ್ಚುತ್ತಿರುವ ಕಡಲ್ಗಳ್ಳರ ದಾಳಿಗಳನ್ನು ನಿಯಂತ್ರಿಸುವುದು.- ಹುಡುಕಾಟ ಮತ್ತು ರಕ್ಷಣೆ (Search and Rescue): ಸಮುದ್ರದಲ್ಲಿ ಸಂಕಷ್ಟಕ್ಕೆ ಸಿಲುಕುವ ನಾವಿಕರ ರಕ್ಷಣೆ ಹಾಗೂ ವಿಪತ್ತು ನಿರ್ವಹಣೆ (HADR) ಕಾರ್ಯಾಚರಣೆಗಳು.- ಒಳನುಸುಳುವಿಕೆ ತಡೆ: ಕಳ್ಳಸಾಗಣೆದಾರರು, ಬೇಟೆಗಾರರು ಮತ್ತು ದೇಶವಿರೋಧಿ ಶಕ್ತಿಗಳ ಒಳನುಸುಳುವಿಕೆಯನ್ನು ತಡೆಯುವುದು. ಅಲ್ಲದೆ ಇದನ್ನು ಅಗತ್ಯವಿದ್ದಾಗ ಸಂಚಾರಿ ಆಸ್ಪತ್ರೆಯಾಗಿಯೂ ಬಳಸಬಹುದಾಗಿದೆ.➤ ಭಾರತೀಯ ನೌಕಾಪಡೆಯ ಬೃಹತ್ ಮುನ್ನೋಟ (ವಿಷನ್ 2030 ಮತ್ತು 2035):ಕಾರ್ಯಕ್ರಮದಲ್ಲಿ ಮಾತನಾಡಿದ ವೈಸ್ ಅಡ್ಮಿರಾಲ್ ಸಂಜಯ್ ವಾತ್ಸಾಯನ ಅವರು ನೌಕಾಪಡೆಯ ಭವಿಷ್ಯದ ಬೃಹತ್ ಯೋಜನೆಗಳ ಬಗ್ಗೆ ಪ್ರಮುಖ ಮಾಹಿತಿಗಳನ್ನು ಹಂಚಿಕೊಂಡಿದ್ದಾರೆ:- ಪ್ರಸ್ತುತ ನಿರ್ಮಾಣ ಹಂತದಲ್ಲಿರುವ ನೌಕೆಗಳು: ದೇಶದ ವಿವಿಧ ಹಡಗು ನಿರ್ಮಾಣ ಕೇಂದ್ರಗಳಲ್ಲಿ ಪ್ರಸ್ತುತ 45 ಯುದ್ಧನೌಕೆಗಳು ನಿರ್ಮಾಣ ಹಂತದಲ್ಲಿದ್ದು, ಮುಂದಿನ 3-4 ವರ್ಷಗಳಲ್ಲಿ ಇವೆಲ್ಲವೂ ನೌಕಾಪಡೆಗೆ ಸೇರ್ಪಡೆಗೊಳ್ಳಲಿವೆ.- ಭವಿಷ್ಯದ ಯೋಜನೆಗಳಿಗೆ ಅನುಮೋದನೆ: ಭವಿಷ್ಯದ ಅಗತ್ಯಗಳಿಗಾಗಿ ಬರೋಬ್ಬರಿ 195 ನೌಕೆಗಳ ನಿರ್ಮಾಣಕ್ಕೆ ಈಗಾಗಲೇ ತತ್ವಬದ್ಧ ಅನುಮೋದನೆ (In-principle approval) ಸಿಕ್ಕಿದೆ. ಇದರಲ್ಲಿ 69 ನೌಕೆಗಳು, 6 ಜಲಾಂತರ್ಗಾಮಿಗಳು (Submarines) ಮತ್ತು 120 ಫಾಸ್ಟ್ ಇಂಟರ್‌ಸೆಪ್ಟರ್ ಕ್ರಾಫ್ಟ್‌ಗಳು ಸೇರಿವೆ.- ಚೀನಾ ಬೆದರಿಕೆಗೆ ಕೌಂಟರ್: ಹಿಂದೂ ಮಹಾಸಾಗರ ಪ್ರದೇಶದಲ್ಲಿ (IOR) ಚೀನಾದ ಹೆಚ್ಚುತ್ತಿರುವ ಪ್ರಾಬಲ್ಯ ಮತ್ತು ಬೆದರಿಕೆಗಳನ್ನು ಎದುರಿಸಲು ಭಾರತೀಯ ನೌಕಾಪಡೆಯು ತನ್ನ ಬಲವನ್ನು ತೀವ್ರವಾಗಿ ವಿಸ್ತರಿಸುತ್ತಿದೆ.- ಗುರಿ: ಪ್ರಸ್ತುತ ಸುಮಾರು 140 ಯುದ್ಧನೌಕೆಗಳನ್ನು ಹೊಂದಿರುವ ಭಾರತೀಯ ನೌಕಾಪಡೆಯು, 2030ರ ವೇಳೆಗೆ 155 ರಿಂದ 160 ನೌಕೆಗಳನ್ನು ಹಾಗೂ 2035ರ ವೇಳೆಗೆ 200 ಯುದ್ಧನೌಕೆ ಮತ್ತು ಜಲಾಂತರ್ಗಾಮಿಗಳನ್ನು ಹೊಂದುವ ಬೃಹತ್ ಗುರಿಯನ್ನು ಮುಟ್ಟಲು ಸಾಗುತ್ತಿದೆ.
